Жамбыл облысы Т.Рысқұлов ауданының тұрғындары үшін неке қию рәсімін салтанатты түрде өткізу мүмкіндігі пайда болды. Жаңа зал М.Өзбеков атындағы Мәдениет үйінде, Жібек жолы, 94 мекенжайында орналасқан.
Бұл жерде тек неке қию рәсімін өткізіп қана қоймай, сондай-ақ баланың дүниеге келуін тіркеу салтанаты мен отбасылық өмірдің мерейтойларын атап өтуге де болады.
Жалпы ауданы 45,09 м² болатын зал мерекенің басты кейіпкерлеріне қонақтарды шақырып, маңызды сәтті жақындары мен туыстарының ортасында атап өтуге мүмкіндік береді. Залдың классикалық үлгіде безендірілуі және интерьерінің мұқият ойластырылған бөлшектері жайлылық, мереке мен салтанаттың ерекше атмосферасын сыйлайды.
«Біздің ауданымызда жастар өте көп. Олар отбасын құрып, балалар дүниеге келуде, отбасылық мерейтойлар атап өтілуде. Біз өмірдің осы маңызды кезеңдерін бірге өткізуге мүмкіндік беретінімізге қуаныштымыз. Бұл орын бақыт пен махаббатқа толы отбасылық естеліктер жазылатын орынға айналады», – деп атап өтті аудандық АХАТ бөлімінің басшысы Раушан Рахишева.
«Азаматтарға арналған үкімет» филиалының деректері бойынша, 2024 жылы Т.Рысқұлов ауданында 258 неке тіркелген, бұл 2023 жылмен салыстырғанда (240 неке) жоғары көрсеткіш.
Естеріңізге сала кетейік, неке қию туралы өтінішті АХАТ бөлімінде немесе электрондық үкімет порталы арқылы беруге болады. Өтінішті қарау мерзімі 15 жұмыс күнін құрайды. Жамбыл облысында 2024 жылдың шілде айынан бастап жас жұбайлар үшін салтанатты неке қию рәсімін өткізу қызметі және неке қию рәсімін арнайы шақыртумен өткізу мүмкіндігі де қолжетімді.
«Азаматтарға арналған үкімет» мемлекеттік корпорациясы
Жамбыл облысы бойынша филиалының PR-менеджері
