Рекордшылары көп Олимпиада: 13 ақпан 2026, жаңалықтар Turkystan.kz
Кеше Аппенин түбегінде өтіп жатқан Ақ Олимпиаданың алтыншы жарыс күні аяқталды. Рекордтан рекорд жаңарып жатқан басты додада әзірше Еуропа елдерінің атлеттеріне қарсылас шақ келмей тұр. 1 күнде 6 медаль жеңіп алған Норвегия командасы жүлде саны жағынан көш бастап тұр. Олардың еншісінде 7 алтын, 2 күміс және 4 қола жүлде бар. Ал екінші орынға табан тіреген Олимпиада иелері – Италия құрамасының қоржынында – 5 алтын, 2 күміс және 7 қола жүлде. Үздік үштікті түйіндеген АҚШ құрамасы алты күннің ішінде 4 алтын, 1 күміс және 2 қола медаль қанжығасына байлады.
Алты Олимпиаданың жүлдегері
Италиялық шорт-трекші Арианна Фонтана тарихта алғаш рет алты Олимпиада қатарынан жүлдегер атанып, әлем жұртшылығын тағы бір рет таң-тамаша етті. Арианна алғаш рет 15 жасында 2006 жылғы Турин Олимпиадасында қола жүлдені еншілеген-тін. 2010 жылы өткен Ванкувер Олимпиадасында тағы қола медальді місе тұтты. 2014 жылғы Сочи Олимпиадасында бір күміс және екі қола жүлдені қоржынға салса, 2018 жылы Пхёнчханда өткен Олимпиада ойындарында бабы мен бағы келісіп, чемпион атанды. Сонымен қатар онда күміс және қола жүлделерді иеленіп, еліне толық медальдар жиынтығын алып қайтқан-тын.
Ал осы аптада Миландағы мұз айдынында өткен аралас эстафетада командаластарымен бірге ешкімге дес бермей, мәре сызығын бірінші болып кесті. Сөйтіп, 35 жастағы Арианна араға 20 жыл салып өз елінде өткен Олимпиадада тағы да жеңіс тұғырына көтерілді. Осылайша, ол Олимпиада ойындары тарихындағы титулы көп шорт-трекші атанды.
Ағайынды чемпиондар
Трамплиннен секіруден Словения құрамасының мықтылары, ағалы-қарындас Домен мен Ника Превцтер аралас жарыста чемпион атанып, тарих бетін жаңартты. Осылайша, енді Превцтер әулетінде 4 бірдей Олимпиада жүлдегері бар.
Домен мен Никаның үлкен ағалары Петер мен Цене де трамплиннен секіруде алдына жан салмай, төртжылдықтың басты додасында талай рет жеңіс тұғырына көтерілген-тін. Ең үлкені – Петер Сочи Олимпиадасында күміс пен қоланы қанжығасына байласа, одан соң Бейжің Олимпиадасында аралас сайыста чемпион атанған болатын. Сонымен қатар сол Олимпиадада ол інісі Ценемен бірге командалық сында күміс жүлдені еншілеген. Петер 31 жасында, ал Цене 26 жасында спортпен қош айтысып, өкшесін басып келе жатқан кенже бауырлары Домен мен Никаға бар білгенін үйретіп, түрлі жарыста қолдау көрсетіп жүрген еді.
Ағаларының жолын қуып, Олимпиада жүлдесін алмайынша тынбауға бел буған Домен мен Ника кешегі командалық жарыста Ника Водан, Анже Ланишектермен бірге топ жарып, Олимпиада чемпионы атанды. Одан бөлек, Ника бірнеше күн бұрын жекелей жарыста Олимпиаданың күміс жүлдегері атанған-тын.
Олимпиадада алтын медаль алып, атой салған бұл жалғыз әулет емес. Швециялық Изабелла мен Расмус Вранолар керлингтің микст түрі бойынша оқ бойы озып шығып, Олимпиада чемпионы атанды. Олар финалда америкалық Кори Тисс пен Кори Дропкиннен 6:5 есебімен басым түсті.
Осылайша, Олимпиада тарихында алғаш рет керлингтің микст сайысы бойынша алтын медальді ағалы-қарындас жеңіп алды.
Айта кетерлігі, Расмус Врано осымен екі дүркін Олимпиада чемпионы атанып отыр. Ол 2022 жылы Бейжіңде өткен Олимпиада ойындарында ерлер арасындағы жарыста алтын медаль иеленген-тін. Ал оның қарындасы Изабелла Олимпиада ойындарына алғаш рет қатысты.
Жеті дүркін жеңімпаз
29 жастағы норвегиялық шаңғышы Йоханнес Клебо Олимпиада ойындарының жеті дүркін чемпионы атанды.
Он бес дүркін әлем чемпионы деген дардай атағы бар Клебо бұған дейінгі Олимпиадаларда шаңғы жарысынан (2018, 2022), командалық спринттен (2018, 2022) және эстафетадан (2018) алтын медаль жеңіп алған-тын.
Ал Италияда өтіп жатқан Олимпиада ойындарында алдымен скиатлоннан, арада бірнеше күн өткен соң классикалық спрингтте қарсылас шақ келтірмей, алтын жүлдегер атанды. Осылайша, Клебо жеті дүркін Олимпиада чемпионы атанды.
Қысқы Олимпиада ойындарында одан көп алтын жүлдені оның жерлестері – шаңғышылар Марит Бьорген мен Бьорн Дэли, сондай-ақ биатлоншы Уле-Эйнар Бьорндален (әрқайсысы сегіз алтыннан) иеленген. Дегенмен осы қысқы Ойындарда Йоханнес Клебоның медаль алуға тағы да мүмкіндігі бар. Абсолютті рекордты жаңартуға бекінген спортшы Олимпиада аяқталғанша тағы бірнеше сынға қатысады.
Бұл Олимпиадада бірнеше рет алтын жүлде алғандардың қатарында тағы бір спортшы бар. Швейцариялық тау шаңғышы Франьо вон Альмен өзінің дебюттік Олимпиадасында алдымен шапшаң түсу жарысында, сосын командалық комбинация сайысында, кейін супергигант сынында барлығын шаң қаптырып, үш дүркін Олимпиада чемпионы атанды.
24 жастағы атлеттің бұл жетістігі 58 жылда алғаш рет болып отыр. Франьо – бір Олимпиадада үш алтын жүлде жеңіп алған екінші тау шаңғышы. Оған дейін әйгілі француз спортшысы Жан-Клод Килли 1968 жылғы Гренобльде өткен Олимпиадада үш алтын жүлдені бірдей иеленген еді.
Медальға кімдер үміткер?
Ақ Олимпиадада ел намысын қорғайтын 36 спортшының басым бөлігі жарысқа араласты. Алайда көпшілігі іріктеу жарыстарынан ары өте алмай, сайысты ерте аяқтауға мәжбүр болды. Қазақстандық спортшылардың арасынан әзірге жақсы нәтиже тіркеген – конькиші Надежда Морозова. Әйелдер арасындағы сында ол 3 000 метр қашықтықты 4:01.20 секундта еңсеріп, 6-орынға табан тіреді.
Ал медальға үміткер шорт-трекші, Олимпиаданың ашылу салтанатында ел туын ұстап шыққан әлем чемпионатының екі дүркін күміс жүлдегері Денис Никша 1 000 метрлікте іріктеу сынынан сүрінді. Іріктеуде мәре сызығын үшінші болып кескен ол келесі кезеңге өту үшін кемі екінші келуі керек еді. Бұған қоса, дәл сол күні аралас эстафетада сынға түскен Абзал Әжіғалиев, Денис Никиша, Яна Хан және Ольга Тихонова да келесі айналымға өте алмады. Дегенмен осымен төртінші Олимпиадасына қатысып жатқан Никишаның жүлдеден үміті бар. Никишаның негізгі қашықтығы – 500 метр. Бірнеше күннен кейін осы сында алтын жүлде үшін таласқа түседі. Дәл осы сайыста қысқы Азия ойындарының және Әлем кубогінің жеңімпазы, 2018 жылы Бейжің Олимпиадасында 4-орынға тұрақтаған Абзал Әжіғалиев те сынға түседі.
Фристайл-могулдан әйелдер арасында сынға түскен Юлия Галышева мен Аяулым Әміренова бірінші іріктеуден өте алмағанымен, екінші қосымша іріктеуде финалға жолдама алған еді. Ақ Олимпиадада Қазақстан қоржынына тағы медаль салады деп үміт артқан атлет, 2018 жылғы Пхенчхан Олимпиадасының қола жүлдегері Юлия Галышева ақтық сында 14-орын, әлем чемпионаттарының екі дүркін қола жүлдегері Анастасия Городко 15-орын, Еуропа кубогі кезеңдерінің жеңімпазы, Денис Никишамен қатар, Олимпиаданың ашылу салтанатында Ту көтеріп шыққан Аяулым Әміренова 18-орын алды. Алайда бұл нәтижелер сегіз үздік могулшы ғана шығатын негізгі финалға өтуге жеткіліксіз болды.
Енді отандастарымыз 14 ақпанда Олимпиада бағдарламасына жаңадан енгізілген параллельді могул жарыста жүлде үшін күреседі.
Фристайл-могулдан ерлер арасында ел намысын қорғаған Павел Колмаков бірінші күні финалға іркілмей өткенімен, екінші жарыс күні 75,70 ұпай жинап, 16-орынға жайғасты. Негізгі финалға өту үшін отандасымыз үздік сегіздікке енуі қажет еді. Ендігі кезекте отандасымыз 15 ақпанда параллельді могул сайысында жүлдеге таласу мүмкіндігі бар.
Медальға үміткер тағы бір спортшы – мәнерлеп сырғанаушы, әлем чемпионатының күміс жүлдегері Михаил Шайдоров қысқа бағдарламада 92,94 ұпай жинап, 5-орынға тұрақтады. АҚШ өкілі Илья Малинин 108.16 ұпаймен көш бастады. Екінші орынды жапониялық Юга Кагияма (103.07 ұпай) иеленсе, үшінші аралық орынға 102.55 ұпаймен франциялық Адам Сяо Хим Фа тұрақтады. Еркін бағдарлама сайыстары 13 ақпанда өтеді.
