Шымкентте әйелге қатысты сексуалдық сипаттағы зорлық ісінде жәбірленушінің денесіндегі жарақаттарға қарамастан, прокуратура ешқандай шара қабылдамай отыр, деп хабарлайды Orda.kz.
Адвокат Айгүл Орынбек өзінің әлеуметтік желісінде Шымкентте әйелге қатысты сексуалдық сипаттағы зорлық ісі тергеліп жатқанын хабарлады. Оның айтуынша, жәбірленуші дене жарақаттарын алған, алайда сараптама оларды жеңіл деп таныған.
Ал прокуратура шағымдарға қарамастан ешқандай шара қолданбай отыр.
«Қазіргі іс бойынша азаматшаға қатысты жыныстық зорлық зомбылық дерегі тіркелген. Жәбірленушіге жасалған әрекет нәтижесінде айтарлықтай дене жарақаты бар екені анық. Дегенмен алғашқы сот-медициналық сараптама “жеңіл жарақат” деген қорытынды берген. Біз мұнымен келіспей, комиссиялық кешенді сот-медициналық сараптама тағайындау туралы өтініш жасадық. Алайда тергеуші бұл өтінішті қанағаттандырусыз қалдырды», – деді Орынбек.
Сонымен қатар, адвокат: «жәбірленушіні емес, қылмыскерді қорғап жатқан сияқты» деп жазды.
«Қылмыс жасады деген күдікпен ұсталған адам сол күні-ақ уақытша ұстау изоляторына қамалды. Қазір алдын ала тергеу жалғасып жатыр. Қылмыстық іс материалдарының толықтығын қамтамасыз ету үшін қосымша тергеу әрекеттері жүргізіліп жатыр. Олар дәлелдеме базасын нығайтуға бағытталған», деп мәлімдеді полиция.
Қазіргі уақытта күдікті қамауда отыр.
Фото: Pixabay
https://kaz.orda.kz/shymkentte-ajeldi-zorlap-sokkyga-zhykkan-er-adam-isin-zhyly-zhappak-boldy-135860/
