«Тірісің бе?»: Қытайда бұрын-соңды болмаған қосымша трендке айналды: 13 қаңтар 2026, жаңалықтар Turkystan.kz
Қытайда атауы біртүрлі естілетін, бірақ сұранысы күрт артқан жаңа мобильді қосымша пайда болды. «Are You Dead?» («Тірісің бе?») деп аталатын бұл сервис қазір елдегі ең көп жүктелген ақылы қосымшалардың біріне айналды, деп хабарлайды turkystan.kz BBC-ге сілтеме жасап.
Қосымшаның жұмыс істеу принципі қарапайым: пайдаланушы әр екі күн сайын бір батырманы басып, өзінің аман екенін растауға тиіс. Егер екі күн бойы белгі қойылмаса, жүйе алдын ала көрсетілген жақын адамға «дабыл» хабарламасын жібереді.
Сервис әсіресе ірі қалаларда жалғыз тұратын жастар арасында кең таралып отыр. Қытайдың ресми деректеріне сүйенсек, 2030 жылға қарай елде бір адамнан тұратын үй шаруашылықтарының саны 200 миллионға жетуі мүмкін. Дәл осы әлеуметтік үрдіс қосымшаның танымал болуына түрткі болған.
Қосымшаны жасаған Moonscape Technologies компаниясы оны «қауіпсіздікке арналған цифрлық серік» деп сипаттайды. Нысаналы аудитория – жалғыз офис қызметкерлері, студенттер, басқа қалада жұмыс істейтіндер және оқшау өмір салтын таңдаған адамдар.
Қытайлық әлеуметтік желілерде қолданушылар қосымшаның қажеттілігін ашық айтып жатыр. Кейбірі «жалғыз тұратын адам үшін мұндай бақылау – тыныштық береді» десе, енді бірі «бірдеңе болып қалса, ешкім білмей қалады ма деген қорқыныш бар» деп жазады.
Бейжіңде жұмыс істейтін 38 жастағы Уилсон Хоу да қосымшаны осы себеппен жүктегенін айтады. Ол отбасынан алыста, уақытша жалдамалы пәтерде тұрады және шұғыл жағдайда анасына хабар баруы үшін қосымшаны орнатқан.
Сарапшылар бұл трендті Қытайдағы урбанизация, әлеуметтік оқшаулану және қауіпсіздікке деген сұраныстың артуымен байланыстырады.
