«ТОЙ МӘДЕНИЕТІ – ҰЛТ МӘДЕНИЕТІ»:
Жамбыл облысында жүзеге асқан «Той мәдениеті – ұлт мәдениеті» облыстық жобасының 2025 жылғы қорытынды кеші мазмұны мен маңызы зор рухани жиынға айналды. Ұлттық салт-дәстүрді жаңғыртуға, қазақы той мәдениетін қалыптастыруға бағытталған бұл кешке өңірдің зиялы қауымы, ардагерлер, өнер адамдары, асабалар мен қоғам белсенділері қатысты.
Кеш шымылдығы Сарысу ауданының өнерпаздары қойған «Той. Махаббат. Өмір» атты сахналық қойылыммен ашылды. Қойылым арқылы қазақ тойының тәрбиелік мәні, махаббат пен өмір сабақтастығы көркем түрде бейнеленіп, көрерменге терең ой салды.
Жиында алғаш сөз сөйлеген облыстық ардагерлер кеңесінің төрағасы Еркімбек Бейсембекұлы Солтыбаев ақ батасын беріп, ұлттық дәстүрді сақтау – ұрпақ алдындағы аманат екенін атап өтті. Ал Шерхан Мұртаза атындағы Руханият және тарихтану орталығының қызметкері, «Асабалар алаңы» қоғамдық бірлестігінің төрағасы Ринат Даниярұлы Нұрақбаев жоба аясында бір жыл бойы атқарылған жұмыстардың қорытынды есебін ұсынып, слайд-презентация арқылы жобаның нәтижелерін таныстырды.
Жоба аясында өңірде той мәдениетін жүйелеу, ысырапшылдықтың алдын алу, ұлттық құндылықтарды дәріптеу бағытында түрлі форматтағы іс-шаралар ұйымдастырылғаны атап өтілді. Соның нәтижесінде белсенді аймақтар мен ерекше еңбегімен көзге түскен асабалар анықталды.
Салтанатты марапаттау рәсімінде Жамбыл облысы әкімдігінің мәдениет және тілдерді дамыту басқармасының басшысы Ерлан Жүнісбай сөз сөйлеп, жобаның қоғам үшін маңызын атап өтті. 2025 жылдың қорытындысы бойынша «Той мәдениеті- ұлт мәдениеті» жобасы аясында Қордай, Шу және Тұрар Рысқұлов аудандары «Жылдың үздік аймағы» атанды. Сонымен қатар жобаға белсене қатысқан 37 асаба «Үздік асаба» дипломымен марапатталды.
Кеш барысында той мәдениетін насихаттауға айрықша үлес қосқан жанашыр ағаларға да алғыс хаттар табысталды. Сондай-ақ «Асабалар алаңы» қоғамдық бірлестігінің қатары жаңа мүшелермен толықтырылып, куәлік пен төсбелгі салтанатты түрде табыс етілді.
Жиын қорытындысында ел ағалары қазақ тойының ұлт айнасы екенін, сол айнаға дақ түсірмей, дәстүр мен мәдениетті қатар ұстау – баршаға ортақ міндет екенін атап өтті. Кеш соңында қатысушылар естелік суретке түсіп, жеңіл музыкамен рухани жиын өз мәресіне жетті.
