Жастар армиядан қандай жағдайда босатылады

Қарулы күштердің ұйымдастыру және жұмылдыру жұмыстары департаментінің әскерге шақыру және әскерден тыс жұмыстар басқармасының аға офицері полковник Дәуренбек Шегебаев тікелей эфирде қандай санаттағы жастар армиядан босатылатынын айтты. Ол әскери қызметтен босату негіздері Әскери қызмет және әскери қызметшiлердiң мәртебесi туралы заңның 26 және 35 бабында көрсетілгенін атап өтті.

Аталған заңның 35-бабына сәйкес, азаматтарды әскери қызметке шақыруды кейінге қалдыруды аудандарда немесе облыстық маңызы бар қалаларда орналасқан әскерге шақыру комиссиясы шешеді. Мұндай шешімге мынадай 4 себеп негіз бола алады:

• отбасы жағдайлары бойынша
• білім алуды жалғастыру үшін
• денсаулық жағдайы бойынша;
• басқа да себептер бойынша.

“ОТБАСЫ ЖАҒДАЙЛАРЫ БОЙЫНША” ДЕГЕН НЕНІ БІЛДІРЕДІ

Басқа адамның көмегiне мұқтаж және толық мемлекеттiк қамсыздандыруға алынбаған отбасы мүшелерін күтумен айналысатын, Қазақстан аумағында онымен бiрге немесе бөлек тұратын жақын туыстары немесе басқа да адамдар болмаған кезде заң бойынша аталған отбасы мүшелерін асырауға мiндетті азаматтарға әскерді кейінгі шегеру мүмкіндігі беріледі.

Қандай жағдайда:

• Басқа адамның көмегiне және күтіміне мұқтаж отбасы мүшелерi болса:
• әкесi, анасы, зайыбы, сондай-ақ әскерге шақырылушының ата-анасы болмаған жағдайда, зейнеткер жасына толған немесе бiрiншi немесе екiншi топтағы мүгедектігі бар адамдар болып табылатын атасы мен әжесi, егер олар оның асырауында болса;
• ата-анасы болмаған жағдайда, бiрiншi немесе екiншi топтағы мүгедектігі бар адамдар болып табылатын немесе он сегіз жасқа толмаған аға-інілерi, апа-сіңлілері;
• әскерге шақырылушыдан басқа бiріншi немесе екiншi топтағы мүгедектігі бар адамдар болып табылатын немесе он сегiз жасқа толмаған бiр және одан да көп балалары бар және оларды жұбайынсыз (зайыбынсыз) тәрбиелеп отырған анасы (әкесi);
• өзінің асырауында жасы бойынша еңбекке қабiлетсiз немесе бiрiншi немесе екiншi топтағы мүгедектігі бар адамдар болып табылатын бiр және одан да көп жалғызiлiктi туыстары (әкесi, анасы, аға-інілерi, апа-қарындастары) бар және оларды жұбайынсыз (зайыбынсыз) асырап отырған анасы (әкесi);
• бiріншi немесе екiншi топтағы мүгедектігі бар адам болып табылатын, екіншiсiн өзi асырайтын және әскерге шақырылушыдан басқа он сегiз жасқа дейінгі бiр және одан да көп бала тәрбиелеп отырған ата-анасының бiрi;
• отбасы мүшелерінің бірінің мүгедектігі бар және әскерге шақырылушы отбасында жалғыз ер бала болса

Одан бөлек мына санаттағы азаматтар да әскерге баруды кейінге шегере алады немесе босатылады

• өзiнiң асырауында анасыз тәрбиелеп отырған баласы (балалары) болса;
• ата-анасының қайтыс болуына немесе олардың ата-ана құқығынан айырылуына немесе сот бас бостандығынан айыруға соттауына байланысты кемiнде екi жыл тәрбиесiнде және асырауында болған адамдар бар азаматтарға;
• некеде тұрған және бiр және одан да көп баласы бар азаматтарға мерзімді әскери қызметке шақыруды кейінге қалдыру беріледі.

БІЛІМ ІЗДЕГЕНДЕР ӘСКЕРДЕН ҚАНДАЙ ЖАҒДАЙДА БОСАТЫЛАДЫ

Білім алуды жалғастыру үшін әскери қызметке шақыруды кімдер кейінге қалдыра алады:

• білім беру ұйымдарында жалпы орта білiм алып жүрген азаматтар
• тиiстi білім беру ұйымдарында күндiзгі оқу нысаны бойынша техникалық және кәсіптік, орта білімнен кейінгі немесе жоғары білім, діни білім беру ұйымдарында, сондай-ақ басқа мемлекеттердің жоғары және (немесе) жоғары оқу орнынан кейінгі білім беру ұйымдарында күндізгі білім алып жүрген азаматтарға оқитыны туралы растайтын құжаттарды ұсынған ретте – бiр жоғары және (немесе) жоғары оқу орнынан кейінгі білім беру ұйымын аяқтағанға дейiн;
• жоғары оқу орнынан кейiнгі кәсiби білім алып жүрген азаматтар

Білім алуды жалғастыру үшін әскери қызметке шақыруды кейінге қалдыру қашықтан оқытуды қолдана отырып білім алатын азаматтарға берілмейді.

ДЕНСАУЛЫҚ ЖАҒДАЙЫ

Денсаулық жағдайы бойынша әскери қызметке шақыруды кейінге қалдыру азаматтарға әскерге шақыру комиссиясының шешiмiмен бiр жылға дейінгi мерзiмге беріледi.

БАСҚА СЕБЕПТЕР ДЕГЕН НЕНІ БІЛДІРЕДІ

Басқа себептер бойынша әскери қызметке шақыруды кейінге қалдыру:

• мектепке дейінгі білім беру ұйымдарында, орта (бастауыш, негізгі орта, жалпы орта), техникалық және кәсіптік, орта білімнен кейінгі білім беру ұйымдарында, мамандандырылған, арнаулы білім беру ұйымдарында, жетім балалар мен ата-анасының қамқорлығынсыз қалған балаларға арналған білім беру ұйымдарында, балаларға қосымша білім беру ұйымдарында, сондай-ақ әдістемелік кабинеттерде кәсіптік қызметін жүзеге асыратын педагогтерге – жұмыс істеп жүрген бүкіл кезеңіне;
• тиiстi бiлiмi бар, мамандығы бойынша ауылдық жерлерде тұрақты жұмыс iстейтiн дәрiгерлерге – денсаулық сақтау ұйымдарында жұмыс iстеп жүрген барлық кезеңiне;
• Қазақстан Республикасы Парламентiнiң немесе жергiлiктi өкiлдi органдардың депутаттарына – олардың депутаттық өкілеттігi мерзiміне;
• өздеріне қатысты анықтау, алдын ала тергеу жүргiзiліп жатқан немесе соттар қылмыстық iстерiн қарап жатқан адамдарға – тиiсiнше анықтау, тергеу аяқталғанға немесе сот үкiмi күшіне енгенге дейiн;
• азаматтық әуе кемелерінің ұшу экипажының мүшелеріне, тиісті білімі бар азаматтық авиация инженерлеріне, механиктеріне және техниктеріне азаматтық авиация ұйымдарында жұмыс істеген бүкіл кезеңге;
• кемелер экипаждарының тиісті білімі бар мүшелеріне су көлігі ұйымдарында жұмыс істеген бүкіл кезеңге;
• құқық қорғау органдарының білім беру ұйымдарында алғашқы кәсіптік даярлықтан өтіп жатқан адамдарға беріледі.
• Офицерлер құрамының әскери атағын бере отырып, запасқа қойылған азаматтарға отбасы жағдайлары бойынша, денсаулық жағдайы бойынша, жоғары оқу орнынан кейінгі кәсіптік білім алуды жалғастыру үшін және басқа да себептер бойынша әскери қызметке шақыру кейiнге қалдырылады.

Әскери жиындарға шақыру кейінге қалдырылмайды.Денсаулық жағдайы бойынша әскерге шақыруды кейінге қалдыруды қоспағанда, жұмылдыру бойынша, соғыс жағдайы кезінде және соғыс уақытында әскери қызметке шақыру кезiнде азаматтарды әскерге шақыруды кейінге қалдыру тоқтатыла тұрады. Денсаулық жағдайы бойынша әскерге шақыруды кейінге қалдыруды қоспағанда, жеке өтiнішін және мүдделi адамдар мен халықты әлеуметтiк қорғау органдарынан нотариат куәландырған тиiстi құжатты ұсынған кезде азаматтар әскерге шақыруды кейiнге қалдырудан бас тартуға құқылы және әскери қызметке шақырылуы мүмкін.

САРБАЗ БОРЫШТЫ ӨТЕЙТІН ОРЫНДЫ ӨЗІ ТАҢДАЙ АЛА МА

Заңда ол қарастырылмаған. Әскерге жастар келгенненн кейін іріктеуден, тексеруден өтеді. Комиссия білімі, жеке басының қасиеттеріне қарай іріктейді.

Ulysmedia коллажы

https://qaz.ulysmedia.kz/news/26379-zhastar-armiiadan-kandai-zhagdaida-bosatylady/