1 млн еуро тұратын «Әйелдің басы» лотореяда ойнатылмақ: 6 қаңтар 2026, жаңалықтар Turkystan.kz
Пабло Пикассоның картинасын иелену үшін енді миллионер болу міндетті емес. Париждегі Christie’s аукцион үйінің бөлімшесі «Әйелдің басы» атты туындыны лотерея арқылы ұтысқа қояды. Бастама Альцгеймер ауруын зерттеуге қаражат жинауды мақсат еткен Alzheimer’s Research Foundation қайырымдылық қоры тарапынан көтерілген. Жобаны суретшінің немересі Оливье Пикассо қолдап отыр, деп жазады The Guardian, деп хабарлайды turkystan.kz.
«Әйелдің басы» картинасын Пикассо 1941 жылы Франция Германияның оккупациясында болған кезеңде салған. Осы себепті туындыда қоңыр, қара, сұр сияқты қою түстер басым. Ұйымдастырушылар 100 еуродан 120 мың лотерея билетін дайындаған. Ұтыс ойыны 2026 жылдың 14 сәуірінде өтеді. Christie’s нәтижесінде 11 млн еуро жинауды көздеп отыр.
Егер барлық билеттер сатылмаса, қатысушыларға төленген қаражат толық қайтарылады. Оливье Пикассо бұл лотереяны атасының өмірлік ұстанымдарының жалғасы деп бағалады. Оның айтуынша, Пикассо Испаниядағы соғыс кезінде, Екінші дүниежүзілік соғыс жылдарында және одан кейін де мұқтаж жандарға қолдау көрсеткен.
Жоба сәтті өтсе, Оливье Пикассо мұндай қайырымдылық бастамаларға жыл сайын қатысуды жоспарлап отыр. Айта кетейік, Францияда 2013 және 2020 жылдары Пикассоның картиналары ойнатылған екі лотерея өтіп, жалпы сомасы 10 млн еуродан астам қаражат жиналған. Ал бұл идеяның авторы – француз телепродюсері әрі Оливье Пикассоның бала күнгі досы Пери Кошин.
