Әлеуметтік желіде 16 келі болатын кір тасын 100 рет көтеріп көпшілікті таңдай қақтырған, Ақтөбе облысы Байғанин ауданы Ноғайты ауылының тұрғыны Бақытгүл Құлметова болып шықты, деп хабарлайды Экспресс К.
Бұл видео 2018 жылы Наурыз мерекесінде түсіріліпті. Ол кезде Бақытгүлдің жасы 28-де екен. Сол жылы ауылда Наурыз мерекесі ерекше тойланыпты. Ауыл халқы түгел жиналды. Түрлі сайыстар өткізіледі. Бір кезде әйелдер арасында кір тасын көтеруден жарыс басталды.
«Ұйымдастырушылар кім шығады деп айқайлап жатты. Ешкім жоқ. Ал біз мектептің атынан өлең айтуға келгенбіз.Ұжымның намысы үшін аяқ астынан шығып кеттім. 16 келі кір тасын оң қолмен — 50, сол қолмен 50 рет көтердім», — дейді Бақытгүл.
Сыйлыққа кішкентай термос саптыаяқ беріпті. Ал ертеңіне келіншектің видеосы әлеуметтік желіні шарлап кеткен. Келіншек сол кезде ауыр затты көтеру әйел адамның денсаулығына зиян екенін де білмеген.
—Жастықтың қызуы ғой. Еш ойланбастан алаңға шығып кеттім. Тасты 100 рет көтеремін деп те ойлаған жоқпын. Ол кезде екі балам бар. Соған қарамастан ауылдағы, мектептегі спорттық жарыстардан қалмайтын едім. Қазір де белсендімін, бірақ ауыр заттарды көтермеймін, — дейді келіншек.
https://aikyn.kz/186797/186797/
