Шымкентте 16 жастағы оқушы қыз бесінші қабаттағы терезеден құлап кетті. Ол шұғыл түрде ауруханаға жеткізілді, бірақ дәрігерлер қызды аман алып қала алмады, – деп хабарлайды Шаңырақ инфо Qazweek.kz ақпарат агенттігі Almaty.tv және OTYRAR сайттарына сілтеме жасап.
Қайғылы оқиға екі күн бұрын Асар-2 ықшамауданында таңғы сағат 11-де болған. Марқұмның көршілерінің айтуынша, қыз мейірімді және әдепті болған. Сондықтан оның мұндай қадамға баруына не түрткі болғаны беймәлім. Жазатайым оқиға болуы мүмкін екені де жоққа шығарылмайды.
“Әлі сене алар емеспіз. Үлгілі отбасы болатын. Ата-анасы жақсы, қызы тәрбиелі. Намаз оқиды, хиджаб киеді. Ата-анасынан жаман әдет байқалмайды. Олар не ішкенін, не темекі шеккенін көрмеппіз”, – дейді жергілікті тұрғын Айгүл Қораласбаева.
Дәрігерлердің айтуынша, биіктен құлаған оқушы қыз комаға түскен, көп жарақат алған. Дәрігерлер қыздың өмірі үшін 12 сағат бойы күрескенімен, нәтиже болмады.
