«Ұлы дала» шағынауданында 160 пәтерлі екі тұрғын үйдің кілтін табыстау рәсімі өтті. Салтанатты шараға Жамбыл облысының әкімі Ербол Қарашөкеев, шаһар басшысы Бақытжан Орынбеков, ардагерлер, зиялы қауым өкілдері мен қала тұрғындары қатысты.
Әуелі аймақ басшысы ізгі тілегін білдіріп, тұрғындарды баспанамен қамту бағытында атқарылып жатқан ілкімді істерге тоқталды.
– Мемлекетіміздің басым бағыттарының бірі – осал отбасыларды баспанамен қамтамасыз ету. Бұл мәселе Мемлекет басшысы Қасым-Жомарт Тоқаевтың да басты назарында. Бүгінде мемлекеттік бағдарламалар шеңберінде облыста тұрғын үйлер салу бағытында ауқымды жобалар жүзеге асырылуда. Осы мақсатта біз жыл сайын тұрғын үй құрылысының көлемін ұлғайтудамыз. Сондай-ақ, қазіргі таңда көне шаһар – Тараздың көкжиегі кеңейіп, халық саны артып келеді. Бұл өз кезегінде тұрғын үй кезегіне деген сұранысты арттырып отырғаны белгілі. Соған байланысты тұрғындарды қолжетімді баспанамен қамту жөнінде қала басшылығына нақты міндеттер жүктелді, – деген Ербол Шырақпайұлы қоныстой иелеріне пәтер кілттері мен тұрмыстық техникалардың сертификаттарын табыстады.
Жаңа пәтерлерге 2012-2015 жылдары аралығында кезекке тұрған көпбалалы аналар, толық емес отбасылар, ІІ топ мүгедектері, жетім балалар мен ҰОС теңестірілген азаматтар қол жеткізді. Солардың қатарында алтын құрсақты ана Мөлдір Шадманова да бар.
– Бүгін талай уақыттан бері армандаған баспанама қол жеткізіп, ерекше қуанышқа кенеліп отырмын. Халқымыз «Өз үйім – өлең төсегім» деп бекер айтпаған. Ұғынған адамға мұндай тәмсілдердің мағынасы тым тереңде жатыр. Баршаға белгілі, қазіргі таңда көне шаһарымызда еңселі нысандар жыл санап бой көтеруде. Оның ішінде жаңадан салынған көпқабатты тұрғын үйлердің қатары молайып келеді. Мұның барлығы мемлекетіміздің жан-жақты қолдауының нәтижесі екені сөзсіз. Мұндай игі істер алдағы уақытта да өз жалғасын тауып, баспаналы болған тұрғындардың қатары бұдан да арта түседі деген сенімдемін. Осы ретте Мемлекет басшысына, облыс, қала әкімдігіне шынайы алғысымды білдіремін, – деді қала тұрғыны ағынан жарылып.
«Aulet Stroy Taraz» ЖШС-нің мердігерлігімен салынған үйдің жалпы ауданы 9 600 шаршы метрді құрайды, барлық пәтер 2 бөлмелі.
Осы тұста айрықша атап өтерлігі, биыл облыста 765 мың шаршы метр тұрғын үй салу жоспарланып отыр. Мәселен, 2024 жылы 26 көпқабатты тұрғын үй пайдалануға берілсе, биыл 2 390 пәтерлі 50 үйдің кілті табысталмақ. Сонымен қатар, осы жылы тұрғын үй кезегіндегі әлеуметтік осал топтар үшін 361 пәтер сатып алынады. Ал Тараз қаласы бойынша биыл мемлекеттік бағдарламалар шеңберінде 42 тұрғын үй пайдалануға берілмек.
