Жақын күндері жануарлар да банктен шот ашуға мүмкіндік алуы ықтимал.
Егер жануарлардың өз банктері болып, ондағы ақшаны табиғатты қорғауға және биоалуантүрлілікті сақтауға жұмсай алса, олардың өмір сүру мүмкіндігі арта түсер ме еді? Осындай идеяны Tehanu атты технологиялық компания ұсынып отыр.
Компания Руандадағы 19 тау горилласынан тұратын отбасымен пилоттық жобаны іске қосты және 2025 жылы бұл жүйені елдегі барлық гориллаларға тарату жоспарлануда.
Tehanu жүйесі жануарлардың қажеттіліктерін анықтау үшін датчиктер мен жасанды интеллектті пайдаланады. Мысалы, браконьерлік тұзақты алып тастау немесе ветеринарлық көмек көрсету. Осыдан кейін платформа арқылы жергілікті тұрғындарды тартып, олардың қызметі үшін ақы төлейді. Бұл платформа «табиғат үшін гиг-экономика» деп аталады.
Осылайша, жануарлар экожүйенің қажеттіліктеріне сәйкес өз қаржылық ресурстарын жергілікті жұмысшыларға бағыттай алады. Компанияның мақсаты – табиғатты қорғауға бөлінген қаржының мөлдір, тиімді жұмсалатынын, тексеруге болатын нәтижелер беретінін, тұрақты жұмыс орындарын құратынын және жануарларды қорғайтынын көрсету.
turkystan.kz
