Жалпы, еселі еңбектің артында толағай табыстар тұратыны анық. Ауданымызда өндіріс саласы қарқынды дамып, қарыштап келеді. Осы орайда, саланың дамуына сүбелі үлес қосқан еңбек ардагерлерінің бірі ерлі — зайыпты
Алжапбаров Бақыт Ермағанбетұлы мен Жақыпова Патима Парсақызы туралы азды-кем айтпақпыз.
Бақыт Ермағанбетұлы 1951 жылы қазіргі Түркістан облысы, Байжансай селосында өмірге келген. Орта мектепті бітірген соң Жаңатас қаласына қоныс аударып, «Қазфосфат» ЖШС-іне жұмысқа орналасты. Қара жұмысты атқара жүріп, Қаратау қаласындағы КазПТИ-ға оқуға түседі. Қайраты мықты, мақсаты айқын болашақ кенші аталмыш оқу орнын бітіріп шығады.![]()
Әр жылдары «Орталық», «Оңтүстік шығыс», «Көксу» руднигінде жұмыс істеген еңбек ардагері 2014 жылы бері зейнетте.
Жұбайы — Жақыпова Патима Парсақызы 1954 жылы бұрынғы Шымкент облысы Шаян ауданында өмірге келді. Кейін әкесімен бірге Құмкент совхозына қоныс аударып, Құмкент совхозындағы орта мектепте бастауыш сыныпты оқыды.
1966 жылы Жаңатас қаласына келіп, «Көксу» поселкасында тұрған. 1971 жылы Жаңатас қаласындағы Қ.Сатпаев атындағы орта мектепті тәмамдады. Болашағын өндіріспен байланыстырған жігерлі қыз Жаңатас қаласындағы кешкі тау кен құрылыс техникумын бітірді.
Еңбек жолын 1971 жылы бастап, «Қаратаухимстрой» трэстіне қарасты «Су Жилстрой» мекемесінде сыршы-сылақшы болып, 15 жылдай бригадада еңбек етті. Қаладағы бой көтерген құрылыс нысандарын салуға қатысты. Қоғамдық өмірде белсенділік танытып, Жаңатас қалалық партия комитетінің мүшесі болды.
1971 жылдан 1997 жылға дейін «Қаратаухимстрой» трэсті жабылғанша бір мекемеде табанды еңбек етті. Мекемеге ауысып өндірістік бөлімде бөлім меңгерушіге дейін қызмет сатысына көтерілді. Мамандар бөліміне ауысып, кейін бөлім меңгерушісі жұмысын атқарды.
Зейнет жасына жеткенше түрлі жұмыстар атқарды. Атап өтсек, №5 кәсіптік мектепте сыршы — сылақшы мамандарды даярлау курсына 2006-2007 жылдары оқытушы болып, келісім шартпен 3 айлық қысқа мерзімді оқудан сабақ берген.
2008-2010 жылдарда қалалық әкімшілікте шаруашылық меңгерушісі болып жұмыс істеп, зейнетке шықты.
Қоғамдық өмірде белсенділік танытып, Жаңатас қалалық партия комитетінің мүшесі болды. Әр түрлі қызметтің сатысынан өткен Патима Парсақызы
Жоғарғы разрядты сыршы — сылақшы мамандығымен жыл сайынғы мерекелік марапаттауларға ие болды. Екі мәрте «социалистік» жарыстың жеңімпазы, «Бес жылдықтың үздігі» төс белгісін иеленді.
1981 жылы КСРО – ның «Ерек еңбегі үшін» медальмен марапатталды. 1981 жылы Қазақстан компартиясының 15 съезіне делегат болды. 1984 жылы Қазақ КСРО-ның еңбек сіңірген құрылысшысы атағы берілді. Айта кету керек ол кезде коммунист болу деген үлкен мәртебе саналатын.
Бүгінде бейнеттің зейнетін көріп отырған еңбек ардагерлері ауданымызды ардақты қариясы мен аяулы анасына айналып отыр.
