25 млн теңге: Қазақстанға арақтың ірі партиясын тез дайындалатын кеспе түрінде кіргізбек болған

Құны 25 миллион теңгеден асатын алкоголь партиясын Қазақстан мен Қырғызстан шекарасы арқылы алып өтуге тырысқандар ұсталды, деп хабарлайды Stan.kz ақпарат агенттігі.

Мемлекеттік кірістер комитетінің баспасөз қызметінің хабарлауынша, контрабандалық жүк тиелген екі автокөлік Жамбыл облысындағы «Айша-бибі» шекара бекетінде анықталды. Тексеру барысында Қазақстан аумағына 25 920 бөтелке Parlament және Antivirus арағын заңсыз әкелу фактісі белгілі болды.

Сондай-ақ, алкоголь өнімдерінің бұл партиясы Big Bon жылдам пісетін кеспе түрінде тасымалданған. Алдын ала бағалау бойынша, ұсталған алкоголь өнімінің жалпы құны 25 660 800 теңге.

Жамбыл облысы бойынша экономикалық тергеу департаменті алкоголь өнімдерінің заңсыз айналымының жолын кесу фактісі бойынша қылмыстық іс қозғады.

https://stan.kz/25-mln-tenge-kazakstanga-araktin-iri-partiyasin-tez-day-364021/