Қаңтар қақтығысы кезінде түрлі қылмыс жасап, абақтыға түскен 200-ден астам адам қазір Алматыдағы ЛА-155/18 мекемесінде отыр. Соттың шешімін күтіп отырған күдіктілерге жаппай тәртіпсіздікке қатысты, тонады, бұзақылық жасады деген айыптар тағылған.
Экспресс К Алматыдағы тергеу абақтысына барып, күдіктілермен тілдесіп қайтты.
Дүрбелең кезінде полицейлер өздерін құдай сезінді ме?
©ЭК/Андрей ХАЛИН
24 жастағы Әбілқазы Есіркеп Шымкенттің тумасы. Алматыда құрылыста жұмыс істеп, нәпақасын тауып келген ол 40 күннен бері тергеу абақтысында отыр. Оған ҚК 272 бабы (жаппай тәртіпсіздік қатысты) бойынша айып тағылған.
Күдіктінің айтуынша, қаңтар қақтығысы кезінде шерушілерді телефонына түсіріпті. Осы әрекетім басыма бәле болды дейді. Егер кінәсі дәлелденсе, ол 4 жылдан 8 жылға дейін түрмеге отыруы мүмкін.
«Митингті видеоға түсіргенім үшін осы жерде отырмын. 5 қаңтар күні Төле би көшесіндегі шеруде жүрдім. Еш нәрсе қиратпадым, тонамадым. Телефонымда адамдардың жүгіріп жүргені және өзімнің сөйлегенім бар. Пәтерде жатқан жерімнен 8 қаңтар күні алып кетті. 12-не дейін Полиция департаментінде жаттым», — дейді Әбілқазы Есіркеп.
©ЭК/Андрей ХАЛИН
Полиция департаментінде өткен 4 күн нағыз тозақтың өзі болды дейді Әбілқазы. Оныңа айтуынша, ұсталғандарды полицейлер аяусыз соққыға жығып,тырнақтарын жұлып қинаған көрінеді.
Азапталғандардың ішінде шыдамай екінші қабаттан секіріп кеткендер де болыпты. Олардың өлі не тірі екенінен Әбілқазы Есіркеп хабарсыз.
«Өліп қаламын ба деп қорықтым. 4 күн сол жерде отырдық. Ұстап алып кеткен кезде үстімде футболка мен шорты ғана болды. Жалаң аяқ келдім осында. Осындай тас еденде сонымен жаттық. Бірақ оны ойлауға уақыт болған жоқ. Өйткені бізді аяусыз азаптады.Мына жерде бір бала бар, тырнағын жұлып тастаған, ерні жыртылып кеткен. Азапқа шыдамай терезеден секіріп кеткендерді де көзімізбен көрдік. Ол жерге кірген адам таяқжемей шықпайды. Полицейлер өздерін Құдай сезініп кетті. Қазір олар жазасын алып жатыр. Жұмыстан шығарыпты дегенді естіп жатырмыз», — дейді күдікті.
«Самса үшін соттамайтын шығар»
©ЭК/Андрей ХАЛИН
ЛА-155/18 мекемесінде әр камераға он адамнан орналастырылған. Әр қайсына тағылған айыптар да, олардың жас ерекшеліктері де әртүрлі. Мәселен 28 жастағы Павел Крымчуктың үстінен самса ұрлағаны үшін қылмыстық іс қозғалған. Күдікті Нұр-Сұлтаннан Алматыға жұмыс іздеп келгенін айтады. Ол Айнабұлақ ықшам ауданындағы көлік жуу орталығына жұмысқа тұрмақшы болған.
«Алматыға 4 қаңтарда келдім. Екі айға пәтер жалдап алдым, бірақ азық-түлік алып үлгермеген едім. Сол кезде қалада дүрбелең басталып кетті. 5 қаңтарда көлік жуатын жерге жұмысқа бардым. Бірақ ол жер жабық болды. Менің ақшам да жоқ еді. Ашық тұрған дүкендер нан да бермей қойды. Қарным ашқаны соншалық, самса сататын дүңгіршекті қиратып, ішінен 20 самса алып шықтым. Сол кезде күзетшілер ұстап, ал ертесіне полицейлер алып кетті», — дейді Павел Крымчук.
©ЭК/Андрей ХАЛИН
Павелдің үстінен ҚК 188 бабы (ұрлық) бойынша іс қозғалған. Қазір ол сотын күтіп жатыр. Күдікті самса үшін соттамайтын шығар деп үміттенеді.
«Мен құнды еш нәрсе ұрлаған жоқпын. Қарным ашқандықтан осы қадамға барып отырмын. Самса үшін түрмеге отыру деген күлкілі нәрсе. Бұйырса сот дұрыс шешім шығарады деп үміттенемін. Мына жерде жағдайымыз жаман емес. 3 мезгіл тамағы бар, ұрып-соғу деген жоқ», — дейді күдікті.
Абақты азаптау орны емес
©ЭК/Андрей ХАЛИН
©ЭК/Андрей ХАЛИН
ЛА-155/18 мекеме бастығының режим және күзет жұмысы бойынша орынбасары Ринат Ахметжанов абақтыда істі болғандарға қысым көрсетілмейтінін айтады. Оның сөзінше, ғаламторда өздерін қалай азаптағандары туралы айтып жатқандар біреудің айтағымен жүргендер.
«Тергеу абақтысын өз көздеріңізбен көрдіңіздер, күдіктілермен сөйлестіңіздер. Егер олардың қинап жатса, күдіктілердің езуінде күлкі болмас еді. Олардың моральдық, психологиялық жағдайлары жақсы. Ал ғаламторда сөйлеп жүргендер деструктивті діни ағымдардың ықпалымен жала жауып отыр. Менің ойымша, оларға біреулер ақша төлеп жатыр. Қоғамға жалған ақпарат тарату арқылы олар тыныштықты бұзғысы келетін сияқты. Осы арқылы олар өздерін ақтағысы келеді. Мұнда қинау, азаптау деген атымен жоқ» , — дейді Ринат Ахметжанов.
©ЭК/Андрей ХАЛИН
©ЭК/Андрей ХАЛИН
ЛА-155/18 мекемесінде отырған 227 күдікті қазір сот шешімін күтіп жатыр. Ал Алматыдағы жаппай тәртіпсіздікке қатысқандардың алғашқы легіне сот үкімі шығып үлгерді. Бұл туралы Экспресс К бұған дейін жазды.
Толығырақ: https://alashainasy.kz/society/30-samsa-urlap-ot-bastyim—abaktyidagyi-maroderdn-oknsh-184662/
материалды қалай болсын қолдану тек қана Alashainasy.kz сілтемесімен бірге рұқсат етіледі
