Жамбыл облысы әкімінің қолдауымен облыста мемлекеттік жастар саясатын дамытудың 2021-2025 жылдарға арналған «Әулиеата жастары» өңірлік бағдарламасы аясында Жамбыл облысы әкімдігі жастар саясаты мәселелері басқармасының бас болуымен ұлттық салт-дәстүр мен құндылықтарды жаңғырту, дарынды, жан-жақты дамыған жастарды қолдау, олардың шығармашылық әлеуетін іске асыру, қоғамдық іс-шараларға тарту, отансүйгіштікке тәрбиелеу, ата-бабамыздан қалған салт дәстүрлерді жастарға насихаттау мақсатында 2021 жылдың 27 қазанында Тараз қаласындағы Ықылас Дүкенұлы атындағы Тараз қалалық мәдениет үйінде «Жігіт сұлтаны-2021» облыстық байқауы өтті.
Облыстық байқау бүгінгі жастардың бойына рух беретін бірегей жоба болып табылады. Байқау барысында қатысушылар 5 кезеңнен өтті.
Бірінші кезеңде, «Білгенге маржан» сұрақ-жауап сайысында үміткерлер белгіленген уақытқа дейін қойылған 25 сұраққа жауап берді.
Екінші кезеңде, «Күш атасын танымас» сайысында үміткерлер оң немесе сол қолдарымен гір тасын көтеріп сайысқа түсті.
Үшінші кезеңде, «Ұлы дала тарландары» атты сайыста ат әбзелдерін таныстырды.
Төртінші кезеңде, «Мен Алаштың ұлымын» атты кезеңде үміткер өзінің білім, өнер жолындағы жетістіктерінен бейнеролик немесе слайд түрінде дайындап, туып-өскен жерін, отбасын, жұмысын, өнерін көрсетті.
Бесінші кезеңде, «Жігітке жеті өнерде аз» өнер сайысында үміткерлер шығармашылық қабілетіне қарай әртүрлі жанрда өз қалауы бойынша өнерін көрсетті.
— Бұл байқау біздің жастарымыздың арасында салауатты өмір салтын насихаттап, ұлттық құндылықтарға шақыратыны сөзсіз. Ақ Жайықтың жігіттері әлемдік майдандарда да атой салса дейміз. Өңіріміз пандемия қыспағында тұрғанына қарамастан біз бұл маңызды іс-шараны өз деңгейінде өткізуге тырыстық. Жігіттің сұлтаны мен сырттаны көп болсын. Байқаудың мақсаты – жастардың бойында Отанына деген сүйіспеншілік сезімін қалыптастыру, ұлттық тәрбие құндылықтарын насихаттау, салт-дәстүрлерді сақтау, ұлттық спорт ойындарын дәріптеу! – дейді ұйымдастырушылар.
Қазылар алқасы үміткерлерді спорттық сайыстағы ептілігі, сөз саптауы, жауаптардың дұрыстығы, актерлік шеберлігі мен сахна мәдениеті критерийлері бойынша бағалап, жеңімпаздарды анықтады.
Байқау қорытындысы бойынша I орынды Шу ауданынан Н.Сейсеналы иемденсе, II және III орындарды Талас ауданынан Қ.Әмірбеков пен Меркі ауданынан Т.Әшімбек өзара бөлісті.
Қатысушыларға бағалы сыйлықтармен «Алғыс хаттар» табыс етілді.
