40 жылдық түлектер ауыл кіреберісіне еңселі стелла орнатты

Шақпақ ауылына кіре берісте, халықаралық маңызы бар Батыс Қытай – Батыс Еуропа автодәлізінің бойында, туған жердің абыройын асқақтататын ерекше заманауи ауылдың кіреберісіне қойылған округ атауы жазылған белгі бой көтерді. Бұл – туған жерден түлеп ұшқан, мектеп бітіргендеріне 40 жыл толған түлектердің елге деген шынайы құрметінің белгісі.

Көз тартарлық сәулетті белгіде «Шақпақ ауылдық округі» деген атау алтын әріптермен жазылып, биік тұғырда қанатын кеңге жайған қыран бүркіт бейнеленген. Бұл – еркіндік пен өр рухтың, биік мұраттар мен ауылға деген перзенттік борыштың символы.

Ашылу рәсіміне арнайы келген Қайсар Сұлтанбаев ағамыз және Жуалы аудандық ардагерлер кеңесінің төрағасы Сейтхан Жұмашев округ атауы жазылған белгінің ресми түрде ашып, жүрекжарды тілектерін арнады.

Жуалы ауданы әкімінің орынбасары Анар Садыққызы аудан әкімінің құттықтауын жеткізіп, 40 жылдық түлектерге Алғыс хаттар табыс етті.

Ауылдың кіреберісіне қойылған округ атауы жазылған белгінің дизайнын ауданның талантты перзенті — дизайнер Ұлан Айхожаев әзірледі. Өзінің өнер туындысы арқылы туған ауылдың рухын бейнелеген Ұлан бауырымыз осы сәтте Қайсар Сұлтанбаевқа қазақтың даңқты қолбасшысы Бауыржан Момышұлының қолтаңбасы бар кітапты сыйға тартты. Бұл – рухани сабақтастық пен ұлтқа деген құрметтің ерекше көрінісі болды.

Түлектерге ауыл тұрғындары атынан сый-құрмет көрсетіліп, ыстық ықылас білдірілді. №4 Балалар өнер мектебінің оқушылары ұйымдастырған әсерлі концерт ауыл аспанын әсем ән мен күйге бөлеп, жиналған қауымның көңілін бір серпілтті.

Батыс Қытай – Батыс Еуропа дәлізімен күн сайын мыңдаған жолаушы өтеді. Енді олар Шақпақ ауылының рухын танытатын осы заманауи белгіні көріп, бұл өңірдің мәдениеті мен тарихы терең, болашағы зор екеніне көз жеткізеді. Бұл — туған жерге деген адалдықтың, ұрпақтар арасындағы рухани үндестіктің жарқын үлгісі.