ӘДЕМІ ЖЫРЛАР – АНАҒА АРНАЛАДЫ
Шаһарда алғаш рет республикалық деңгейде «Анаға сәлем» мәнерлеп оқу байқауы ұйымдастырылған болатын. Бір ай бұрын жарияланған іс-шараның қорытындысы бүгін яғни 8 наурыз – Халықаралық әйелдер күніне орай түйінделді.
Қала әкімі Ержан Жылқыбаев «Анаға тағзым» орталығына арнайы барып, мерекелік кешті тамашалады. Аналарды, нәзік жандыларды шуақты мерекемен құттықтап, жеңімпаздарды марапаттады.

Айта кетсек, жыр додасына қатысуға 35 үміткер өтінім берген. Олар белгілі авторлардың «АНА» тақырыбын қозғаған өлең шумақтарын, мәнерлеп оқып қана қоймай арнайы бейнеролик дайындап орталыққа алдын-ала жіберген.

Жүзден жүйріктерді анықтау мақсатында ақындар мен мәдениет және өнер майталмандардан құралған әділқазылар алқасы құрылды.
Ал, байқау қорытындысына келетін болсақ, бірінші орынды өзгелерден ерек болған Тараз өңірлік университетінің студенті Альбина Заутбек иеленіп кетті. Сондай-ақ екі екінші орын мен үш үшінші орын үздіктері де марапатталды.
Мәнерлеп оқу байқауының үздік 10 жеңімпазы шаһар басшысымен бірігіп, орталық ауласына өз аналарының құрметіне ағаш көшеттерін отырғызды. Іс-шараның өзгелерге үлгі әрі қызықты тұсы осы болса керек.