Кеше қала әкімі Б.Орынбеков зиялы қауым өкілдерімен және ардагерлермен кездесті. Басқосуда шаһар басшысы қазіргі таңда қарттарға мемлекет тарапынан әлеуметтік қызмет түрлері мен жан-жақты көмек көрсетіліп жатқанын жеткізді. Жиында қала басшысы ардагерлермен еркін форматта пікір алмасып, алдағы жоспарымен бөлісті.
Бақытжан Орынбеков Таразды түлету бағытында ауқымды жұмыстар атқарылатынын айтты. Әр сала бойынша жүйелі жоспар құрылып, оған сай тиісті жұмыстар өз деңгейінде орындалатынын жеткізді.
Басқосуда ардагерлер де өз ойын ортаға салып, бірақатар мәселелерді көтерді. Оның ішінде жол жөндеу, ирригация, жасыл желекті суғару, қоқыс жәшіктерін орнату мәселері бар. Сонымен қатар, жастарды жұмыспен қамту, білім гранттарын көбірек бөлу сынды пікірлер де айтылды.
Жиынды қорытындылаған шаһар басшысы қаланы дамыту жолындағы жұмыстарды атқаруда қазыналы қарттарымыздың ақыл-кеңесі басты орында екенін жеткізді. «Қоғамның тұрақтылығын орнықтыруда, жастарымыздың бойында ұлтжандылық қасиеттерін қалыптастыруда үлестеріңіз зор. Қаламызды көркейту жолында өзара байланыс орнатып, тығыз жұмыс жүргіземіз деген сенімдемін», — деді Бақытжан Әмірбекұлы.
