«Қыс қыспайды деме» деген халық нақылы «кәрі құдаңыздың» әйтеуір бір қиғылық салатынынан хабар берсе керек. Осыған орай жұрт «қыс шанасын жаз сайлап», күні бұрын отын-су мен өзге қорды толықтырып алуға қам жасалатыны белгілі. Сондай-ақ, қысқы маусымда жолдарды тазалау мен оны күтіп ұстау жұмыстарына дайындық та үлкен мәнге ие екені даусыз
Күрең күз келіп, әлсін-әлсін «кәрі құда» қыстың хабары сезіле бастады. Енді көзді ашып-жұмғанша қақаған аяз бен түтеген бораны көп күндер де келері күмәнсіз. Ал өңірдің қысқа дайындығы қалай? Қыста қысылмас үшін қандай жұмыстар атқарылуда? Әсіресе жолдарды қысқы кезеңге дайындау кезек күттірмейтін мәселе.
Облыс аумағындағы жолдарды қыс мезгілінде күтіп ұстау айрықша бақылауға алынған.
Осыған орай бүгін Қордай ауданына жұмыс сапарымен облыс әкімінің орынбасары Қанатбек Мәдібек келіп, ауданның коммуналдық қызметінің қысқы уақыттағы жолдарды күтіп-ұстау маусымына дайындығын көрді.
Аудан әкімінің орынбасары Бақыт Сахатов және ТҮКШ және АЖ бөлімінің басшысы Ануар Абсейітов қысқы уақыттағы жолдарды күтіп-ұстау маусымына дайындық барысымен таныстырып өтті. Қанатбек Мәдібек коммуналдық қызмет өкілдері мен «ҚАЖсервис» ЖОФ «ДЭУ-34» қызметкерлерімен тілдесіп, қысқы маусымға техникалардың, жұмысшылардың және материалдық-техникалық базаның дайындығын сұрады.
Өз кезегінде коммуналдық қызметкерлер өздерінің қарамағындағы барлық техникаларды және жаңа сатып алынған техникаларды да көрсетіп, таныстырып шықты. 
Облыс әкімінің орынбасары өткен қыс мезгілінде аудандағы болған дауылды борандарға дайындық жоғары деңгейде болуы керектігін атап өтті.
