Атырау қаласының жол инфрақұрылымы жыл сайын қарқынды түрде дамып келеді. 2024 жылы қала аумағында 49,4 шақырым жолға тас жол төселсе, 2025 жылы бұл көрсеткіш 66,8 шақырымға дейін ұлғаяды деп жоспарланып отыр, деп хабарлайды AtyrauPress тілшісі.
Осы жылы жөндеу жұмыстары Қожақаев, Елорда, Тайманов, Қабдолов, Сәтпаев, Луговая, Садықов көшелерінде жүргізіледі. Бұл – қала тұрғындарының күнделікті қозғалысын айтарлықтай жеңілдетіп, көлік қатынасының сапасын жақсартуға бағытталған маңызды қадам. Бұл туралы қалалық әкімдіктің баспасөз қызметі мәлім етті.
Сонымен қатар, Қаныш Сәтбаев атындағы даңғылды қайта жаңғырту жұмысы биыл сәуір айында басталады. Ұзындығы 2,34 шақырым болатын жолды кеңейту аясында Ерниязов көшесінен Құрманғазы көшесіне дейінгі аралыққа қосымша бір жолақ қосылады. Сонымен қатар, даңғылдың айналасы абаттандырылып, көлік қозғалысы үшін қолайлы жағдай жасалады.
Қала ішіндегі көлік кептелісін азайту мақсатында Атырау-Астрахань тас жолы арқылы «Нұрсая» ықшам ауданына тікелей шығуға мүмкіндік беретін жол салынады. Ұзындығы 1,4 шақырым болатын жаңа жол Самал ықшам ауданындағы 31 көше мен Атырау-Астрахань трассасын байланыстырады. Бұл жоба биылғы І тоқсанында басталады.
Сондай-ақ, Жастар көшесінен Әбілқайыр даңғылына шығатын жаңа жол құрылысы жалғасуда. 2023 жылы басталған үш шақырымдық жолдың екі шақырымына асфальт төселді, қазір көпір салу жұмыстары жүргізілуде. Жоспар бойынша, бұл жоба жыл соңына дейін аяқталады.
Жол сапасын арттыру – қала инфрақұрылымын дамытудың басты бағыттарының бірі. Алдағы уақытта да Атыраудың жолдары заманауи талаптарға сай жаңартылып, тұрғындарға ыңғайлы жағдай жасалмақ.
https://atpress.kz/kk/news/atyrauda/atyrau-k-sheleri-adam-tanymastaj-zgermek-2?fbclid=IwY2xjawIKg3pleHRuA2FlbQIxMQABHZI5LGa9mpl9ylsdu01vSp26U46H57DxzsUENSsSaoUk3CG11Ndl2yYhKw_aem_C6-dWyIKMil3JaI40aKNMQ
