Атырауда ағып жатқан қара түсті сұйықтыққа қатысты бейнежазба желіде желдей есуде, деп хабарлайды AtyrauPress тілшісі.
Осы орайда, біз Атырау мұнай өңдеу зауытының баспасөз қызметінен мәселенің мәнісін сұраған едік. Ал, бейнежазбаны мына жерден көре аласыздар.
«Зауыттың экологтары мен Экология департаментінің мамандары оқиға орнына дереу барып, тиісті тексеріс жүргізді. Нәтижесінде қара түсті сұйықтықтың кәріз жүйесінен ағып жатқаны анықталды. Айта кету керек, бұл ақау зауыт аумағында емес және зауыттың өндірістік жүйелеріне қатысы жоқ. Аталған кәріз желісі “Атырау облысы су арнасы” мекемесіне тиесілі. Қазір “Атырау облысы су арнасы” мекемесінің бригадасы желідегі ақауды жөндеу жұмыстарын жүргізіп, кәріз суын сору шараларын атқаруда. Зауыт экологиялық қауіпсіздік мәселесіне үлкен жауапкершілікпен қарайды және қоршаған ортаға әсер ету қаупі бар кез келген жағдайды бақылауда ұстайды. АМӨЗ штаттық режимде жұмыс істеп тұр. Өндірістік процестер тұрақты жүріп жатыр» дейді зауыттың баспасөз қызметіндегі мамандар.
Ал, «Атырау облысы Су Арнасы« кәсіпорнына сауал жолдағанымызда, ондағылар ағынды сулар төгілген жерде тиісті жұмыстар жүргізіліп жатқанын мәлім етті.
«Оқиғаның алдын ала себебі кәріз суын ағызу желісінде орын алған ақау болуы мүмкін. Бірақ әзірге түпкілікті тұжырым жасауға әлі ерте. Кәсіпорын мамандары ақауды жою үшін бар күштерін салуда. Жасалып жатқан жұмыс барысы туралы қосымша хабарланатын болады» деп жауап берді мекеменің баспасөз қызметінде.
Сол сияқты, біз облыстық экология департаментінен де қосымша ақпарат сұрастырдық.
«27 ақпан күні әлеуметтік желіде тараған бейнежазбаға байланысты экология департаменті мамандары оқиға орнына барып, анықтау жұмыстарын жүргізді. Алдын ала анықтаумен, жер бетіне шыққан су “Атырау облысы су арнасы” мекемесінің жер астымен өтетін кәріз желісінде ақау пайда болып, соның себебінен шыққан. Қазір “Атырау облысы су арнасы” мекемесінің мамандары желідегі ақауды жою жұмыстарын жүргізуде. Аталған оқиға бойынша полиция басқармасына арыз жазылды» дейді департаменттің баспасөз өкілдері.
Амандық САҒЫНТАЙҰЛЫ
https://atpress.kz/kk/news/ekologiya/k-ara-t-sti-s-jyk-tyk-atyraulyk-tardy-ala-datyp-k-ojdy-video?fbclid=IwY2xjawItNx1leHRuA2FlbQIxMQABHZVsX2KuHGDwc_8hRazMFXL3WreZ1mt2Jpf-iC4aUkMAWhE3ylnUKY8wTg_aem_5QACca6iBtAxYsYlVNjWrA
фото: ATPress.kz
