Жамбыл спортының жұлдызы әркез биік. Оны спортшыларымыз әлемдік ареналарда сан мәрте дәлелдеп, Олимп биігінде де көк байрағымызды желбіретуде. Одан бөлек, жас жампоздарымыз да жасындай жарқырап, байрақты бәсекелерде атой салуда. Міне, сондай саңлағымыздың бірі — Ғалымжан Қырықбай ХХХ – Жазғы Бүкіләлемдік Универсиададан алтын медальмен оралып, мерейімізді үстем етті.
Жалпы Универсиада Халықаралық студенттік спорт федерациясының ұйымдастыруымен екі жылда бір өтетін бәсі жоғары бәсеке. Студенттер додасының 50 жылдық тарихы бар. Аталмыш аламанға 17 мен 28 жас аралығындағы жастар қатыса алады. Бір жылы қысқы спорт түрлерінен өтсе, екінші жылы жазғы ойындардан ұйымдастырылады.
Қазақстан Универсиадаға 1993 жылдан бастап қатысуда. Осы аралықта жастар жарысында 700 спортшымыз бақ сынып, 186 медальға қол жеткізді. Оның 106-ы жазғы ойындардан болса, 80-і қысқы спорт түрлерінен.
Биыл жазғы Универсиада Италия мемлекеті Неаполь қаласында түндігін түрді. 3-14 шілде аралығын қамтитын додада отандастарымыз лайықты деңгейде өнер көрсетіп, осы таңға дейін 1 алтын, 3 күміс, 1 қола медаль жеңіп алды. Міне, осы жалғыз алтынды жерлесіміз Ғалымжан Қырықбай дзюдо спортынан қоржынымызға салып отыр.
Негізі Универсиадаға облыстан 3 спортшы атанған. Соның қатарында Ғалымжан Қырықбай қарсыластарын қоғаша жапырып, теңдессіз екенін танытты. Ол барлық бес белдесуде қарсыластарын алып та, шалып та ұрып, ақтық айналымда франциялық Хадринн Ливольсиді тізерлетті. Осылайша абсалюттік салмақ дәрежесінде жеңіске жеткен жерлесіміз, Қазақстан тарихында дзюдо спортынан шыққан тұңғыш Универсиада чемпионы атанды. Бүгінде Ғалымжан облыс әкімдігі дене шынықтыру және спорт басқармасының «Олимпиада жеткіншектерін даярлау орталығының» тәрбиеленушісі, сондай-ақ М.Х.Дулати атындағы Тараз мемлекеттік университетінің «Дене шынықтыру және спорт» мамандығының студенті. Бапкерлері даңқты балуандар Ғалымжан Жылгелдиев пен Бақтияр Ақбергенов.
Жоғарыда айтып өткенімізден Универсиадада облыс намысын үш спортшы қорғауға аттанған. Соның бірі ТарМУ-дың түлегі Ақмарал Ерназар да әйел арасындағы дзюдо күресінде барын салып белдесті. Алайда екінші айналымда сәттілік жолдас болмай, жүлдеге қол жеткізе алмады. Десе де, бұл Ақмарал үшін үлкен тәжірибе болғаны даусыз. Себебі әлемнің кіл мықты спортшыларымен тең дәрежеде өнер көрсетіп, екінші айналымға дейін өту оңай шаруа емес. Сондықтан Ақмаралдың алар асуы алда деп сенеміз.
Кеше мемлекет мақтаныштарын жамбылдық жанкүйерлер «Алматы-Тараз» бағытындағы кіреберіс қақпадан бар салтанатымен күтіп алды. Жанкүйерлерді облыс әкімінің бірінші орынбасары Бекболат Орынбеков бастап барып, чемпионға деген ыстық ықыласын білдірді.
— Бұл ел тарихында бұрын соңды болмаған айтулы оқиға. Олай дейтінім, Ғалымжан Қазақстаннан шыққан дзюдо спортынан тұңғыш Универсиада чемпионы атанып отыр. Сондықтан жерлесіміздің жеңісімен жамбылдықтар ғана емес, барша қазақстандықтар мақтанады.
Ғалымжанға алдағы байрақты бәсекелерде де жеңісті жорығы жалғаса берсін деп тілеймін. Ел үшін туған ердің ерлігі сөзсіз тарихта қалары хақ, — деді Бекболат Серікбекұлы.
Бұдан кейін сөз алған М.Х.Дулати атындағы Тараз мемлекеттік университетінің ректоры Махметғали Сарыбеков Универсиадаға аттанған қос спортшының жеткен жетістігі туралы айта келе, екеуіне бірдей оқу орнының шәкіртақысын тағайындады.
— Жалпы Тараз мемлекеттік университетінің қабырғасынан талай толағайлар түлеп ұшты. Олардың қатарында Олимпиада биігін бағындарғандар да бар. Ал Универсиадаға аттанға қос студентіміз Ғалымжан Қырықбай мен Ақмарал Ерназардың ерлігі сөзсіз кейінгілерге үлгі-өнеге. Ғалымжан бұған дейінде түрлі додаларда атой салып жүрген спортшы. Ал Ақмаралға Универсиадада сәл сіттілік жолдас болмай қалды. Десе де, екінші айналымға дейін өту үлкен абырой. Сондықтан Ақмаралдың бағындырар белесі алда деп үміттенеміз.
Осы орайда чемпиондық атақпен оралған Ғалымжанға оқу орнының 5 айлық шәкіртақысын тағайындағанымды айтқым келеді. Ал Ақмаралға екі айлық шәкіртақы беру туралы шешім шығардым. Мұндай қолдау спортшыларымызды жігерлендіріп, олар алдағы уақытта да мемлекетіміздің, облыстың, университеттің абыройын асқақтата береді деп сенемін, -деді университет ректоры.
Ал толағайымыз Ғалымжан Қырықбай жамбылдық жанкүйерлерге алғысын білдірді.
— Әлемдік бәсекеде қолдау білдіріп, жеңіске деген жігер берген барша жанкүйерлерге алғысымды білдіремін. Қай спортшы болмасын аламанға қосылғанда топ жаруды ойлайтыны белгілі. Мен де мемлекетіміз бен облыс намысы үшін барымды салып белдестім. Нәтижесінде айым оңынан туып, алтын медальға қол жеткіздім. Бұл менің ғана емес, бүкіл қазақстандықтардың жеңісі. Сондықтан бұл жеңісімді еліме арнаймын.
Екі айдан кейін Токио Олимпиадасының алдындағы додаларға дайындық басталады. Осы сындардан да сүрінбей өтіп, Токиода өнер көрсетсем деген арманым бар. Бұйыртса, бұл биікке де жетерміз, — деді чемпион.
Бұдан кейін жанкүйерлер қос спортшыны гүлге көмкеріп, естелік суретке түсті.
Иә, шынында да бақ пен бап қатар бәске түскен додада дара шабу екінің-бірінің басына бұйырмайтыны анық. Ғалымжанның бұл ерлігі тарихта алтын әріптермен қалары хақ.
Бәрекелді демекпіз балуандарға. Жеңіс құтты болсын жерлестер!
С.Сатылғанов
