Биыл облыста көлік инфрақұрылымын дамытуға бағытталған 72 жоба іске асырылмақ, деп хабарлайды AtyrauPress тілшісі.
Көлік инфрақұрылымын дамыту аясында жалпы ұзындығы мың шақырымнан асатын 72 жоба іске асырылмақ. Атырау облысы жолаушылар көлігі және автомобиль жолдары басқармасы басшысының м.а. Ержан Хайноллаев брифинг барысында бұл жобалардың жаңа жол құрылысын, қайта жаңғыртуды, сонымен қатар күрделі және орташа жөндеу жұмыстарын қамтитынын атап өтті, — деп хабарлайды Өңірлік коммуникациялар қызметі.
— Біз облыстық және аудандық маңызы бар жолдарды жақсартуға ерекше көңіл бөлудеміз. Атап айтқанда, «Құрманғазы-Приморье-Утеры-Котяевка» (29 шақырым), «Индер-Қарабау-Миялы-Сағыз» (87 шақырым) жолдары қайта жаңғыртылады, сондай-ақ «Миялы-Ойыл» (18 шақырым) және «Атырау-Индер» (100 шақырым) жолдары күрделі жөндеуден өтеді. Одан бөлек аудандық және ауылішілік жолдардың сапасын жақсарту бағытында нақты жұмыстар жүргізіледі. Қалалық және аудандық маңызы бар жолдарды жөндеумен қатар жаяу жүргіншілерге арналған жол инфрақұрылымы да өрлейді, — деді Е.Хайноллаев.
Спикердің сөзінше, бұл жобалар осы жылы аяқталып, нәтижесінде өңірдегі жол сапасы 82%-ға дейін жақсартылмақ. Бұған қоса жол сапасын бақылау үшін «Жол активтері ұлттық сапа орталығы» филиалымен 190 млн теңгеге келісімшарт жасалып, зертханалық бақылау жұмыстары жүргізілуде.
Сәуле МАҒАУ
https://atpress.kz/kk/news/ekonomika/biyl-atyrauda-k-andaj-zholdar-zha-gyrtylatyny-ajtyldy?fbclid=IwY2xjawI9YF1leHRuA2FlbQIxMQABHYmpx4HREMTZZg9bOQYpszQ58FncYF3JIfKmfnXySXB_uzo2ASdvuf4YCA_aem_OA45WRkZlcnkedd6ABKMfw
фото; AtyrauPress
