Тарихи тұрғыдан қарағанда, күміс алтынға қарағанда аса сенімді металл саналмаған. Құбылмалылығына, екі түрлі рөл атқаратынына, сонымен қатар белгілі бір оқиғаларға байланысты тіпті «кедейлердің алтыны» немесе «шайтан металы» аталып кеткен. Бұл атау оған әділ берілген десе де болады: күміс бір түнде байытып жіберуі де, банкрот қылуы да мүмкін.
Қорғану құралы
Күмістің бір унциясы қазір шамамен 32,50 доллар деңгейінде саудаланып жатыр. Бұл бағалы металл кейінгі бір жылда 43 пайызға өскенін көрсетеді, бұл, тіпті бірнеше рет тарихи максимумнан асып түскен алтынның 44 пайыздық өсіміне жақын.
Осылайша, алтын-күміс коэффициенті қазір шамамен 91 деңгейінде, бұл оның тарихи орташа көрсеткіші 65-тен әлдеқайда жоғары. BARRONS мәліметінше, бұл күмістің алтынға қарағанда төмен бағаланғанын және бағасы одан ары өсуі ықтимал екенін көрсетуі мүмкін.
Өткен айда Аустралиядағы Perth Mint күміс монеталары мен құймаларының сатылымы 16 пайызға өсіп, 482 451 унцияға жеткен. Бұл өсімді Reuters АҚШ президенті Дональд Трамптың тарифтік шараларына байланысты инвесторлардың құнды металдарға қызығушылығының артуымен байланыстырып отыр.
Осы аптада The Economist Нью-Йорктегі трейдерлер Лондондағы алтын қоймаларын босатып жатқаны туралы жазды. Себебі олар болашақта мұндай импортқа баж салығы салынуы мүмкін деп қауіптенеді. Осылайша, күмісті сатып алуды жылдамдатқан. Сондай-ақ басылым қауіпсіз активтер мен күн панельдеріне деген сұраныс күміс бағасының күрт өсуіне ықпал еткенін де айтып өткен.
Тарихи тұрғыдан алғанда, экономикалық дағдарыстар мен қор нарығының құлдырауы кезінде күміс сияқты құнды металдардың бағасы айтарлықтай өскен. Қазіргі кезде АҚШ нарықтары рекордтық деңгейге жеткенін ескерсек (1929, 1966 және 2000 жылдардағы максимумдармен ұқсастық бары байқалады), кей сарапшылар күмісті ықтимал нарық өзгерістерінен қорғану құралы ретінде қарастырып отыр.
Барлығы саясатқа келіп тіреледі
Күміске деген сұраныстың өскенімен, нарықтағы белгісіздік инвесторларды сақтық танытуға мәжбүрлеп отыр. Әсіресе, АҚШ пен басқа елдер арасындағы сауда шиеленістері мен Федералдық резервтің (ФРЖ) алдағы шешімдері басты назарда.
АҚШ президенті Дональд Трамп Канадаға қарсы сүт өнімдері мен ағашқа қосымша тарифтер енгізу мүмкіндігін ескерткеннен кейін нарықтағы тұрақсыздық күшейе түсті. Бұған дейін Вашингтон Канада мен Мексикадан әкелінетін тауарларға 25 пайыздық тарифті бір айға кейінге шегерген еді, алайда Канада өз санкцияларын сақтап қалды. Сонымен қатар Қытайдың белгілі бір америкалық ауыл шаруашылығы өнімдеріне тарифтері күшіне енді. Бұл факторлар АҚШ экономикасының болашағы мен жаһандық саудаға қатысты алаңдаушылықты арттырып отыр.
Инвесторлардың шешіміне АҚШ президентінің Fox News арнасына берген сұхбаты да әсер еткен. Онда Трамп АҚШ экономикасының рецессияға ұшырауы немесе инфляцияның өсу қаупі туралы нақты жауап беруден бас тартты. Бұл белгісіздік қаржы нарығындағы тұрақсыздықты одан әрі күшейтіп, инвесторларды алтын мен күміс сияқты қауіпсіз активтерге назар аударуға итермелеуі мүмкін.
Дегенмен Федералдық резерв жүйесінің төрағасы Джером Пауэлл жұма күні жасаған мәлімдемесінде экономикалық белгісіздікке қарамастан, пайыздық ставкаларды дереу төмендетудің қажеті жоқ екенін атап өтті. Бұл шешім нарыққа сенімділік беруі мүмкін, алайда инфляцияның жоғарылауы немесе рецессия қаупінің күшеюі жағдайында ФРЖ өз саясатын қайта қарастыруға мәжбүр болуы ықтимал.
Күміс бағасының қазіргі тұрақтылығы нарықтағы белгісіздіктің қаншалықты жоғары екенін көрсетеді. Сауда қақтығыстары, АҚШ-тың инфляция деректері және ФРЖ-ның шешімдері металл нарығындағы болашақ динамикаға тікелей әсер етпек. Инвесторлар экономикалық көрсеткіштер мен орталық банктердің шешімдерін мұқият бақылап, ұзақмерзімді стратегияларын қайта қарастыра бастауы мүмкін.
Байытуы да, банкрот қылуы да оңай
Тарихи тұрғыдан қарағанда, күміс алтынға қарағанда аса сенімді металл саналмаған. Құбылмалылығына, екі түрлі рөл атқаратынына, сонымен қатар белгілі бір оқиғаларға байланысты тіпті «кедейлердің алтыны» немесе «шайтан металы» аталып кеткен. Бұл атау оған әділ берілген десе де болады: күміс бір түнде байытып жіберуі де, банкрот қылуы да мүмкін.
Алтынға қарағанда күмістің бағасы күрт өсіп немесе құлдырай алады, себебі оған индустриялық сұраныс пен инвестициялық алыпсатарлық қатар әсер етеді. Күміс трейдерлер мен инвесторлар үшін қауіпті актив саналады, өйткені нарықтағы кішігірім өзгерістердің өзі бағасына қатты ықпал етеді.
1970 жылдардың аяғында Нельсон және Уильям Хант күміс нарығын бақылауға алып, оның бағасын 6 доллардан 50 долларға дейін көтерген. АҚШ билігі араласқан соң, күміс бірнеше күн ішінде 50 пайыздан астам арзандап, көптеген инвестор шығынға ұшырады. Осы оқиға күмістің «қауіпті» актив екеніне деген сенімді нығайтып, бағаны жасанды түрде төмендету теорияларымен байланыстырды. JPMorgan сияқты ірі банктер күміс бағасын басқарып отырады деген де пікір бар.
Осылайша, бұрын тек белгілі бір топ арасында сұранысқа ие болған активке сұраныс арта бастады. Күміс фьючерстері мен опциондық келісімшарттарын тау-кен компаниялары, дайын өнім өндірушілері және күміс құрамдас өнеркәсіптік материалдарды пайдаланатын кәсіпорындар баға тәуекелін басқару үшін қолданады. Қымбат металл ретінде күміс инвестициялық портфельдерде де маңызды рөл атқарады. Күмісті ең көп пайдаланатын салалар – фотография, зергерлік бұйымдар және электроника өнеркәсібі.
Әлемдегі ең ірі күміс өндіруші елдерге Мексика, Перу және Қытай жатады. Одан кейінгі орындарды Аустралия, Чили, Боливия, АҚШ, Польша және Ресей иеленеді.
Күміс бағасының қазіргі тұрақтылығы нарықтағы белгісіздіктің қаншалықты жоғары екенін көрсетеді. Бұл үрдіс жалғасатын болса, күміс алдағы жылдары инвестицияның жаңа мүмкіндігіне айналуы мүмкін. Трейдерлер мен инвесторларды мазалаған басты сұрақ – бұл өсім баянды бола ма, әлде нарықтағы уақытша құбылыс па? Қалай болғанда да, күміске деген қызығушылықтың артуы оның рөлі айтарлықтай өзгеріп жатқанын көрсетеді.
https://turkystan.kz/article/257206-kumistin-kuni-tudy-ma
