Облысымызда тұрғындардың әлеуметтік, экономикалық жағдайын жақсартуға бағытталған пилоттық жоба қолға алынуда , – деп хабарлайды «shanyraqinfo.kz» ақпарат агенттігі.
Өмірлік қиын жағдайда жүрген адамдарға, отбасыларға әлеуметтік қызметтер мен әлеуметтік көмек көрсетудің ықпалдастырылған үлгісін енгізу бойынша бастау алған жоба сол адамдарға кешенді түрде көмек көрсетуді көздейді.
Пилоттық жобаны іске асыру аясында құрылған ведомствоаралық комиссияның алғашқы отырысы да өтті. Онда топ мүшелері әр отбасының хал-жайларын жете талқылап, қандай көмектің шын пайдасы тиетінін нақтылады.
Жалпы, арнайы құрылған жұмысшы топтың зерделеуімен облысымыздан өмірлік қиын жағдайдағы 12 отбасы анықталған. Жұмысшы топтың алғашқы отырысында кешенді көмек көрсетуге алынған 12 отбасының ішінен төртеуінің жеке жоспарлары жан-жақты қаралды.
Жиында оларға көрсетілетін жан-жақты көмек бойынша бағдарламалар жан-жақты талқыланды. Бұл отбасыларда баспанасы жоқ, кішкентай балалары бар, бірақ балабақшаға орналастырылмаған, денсаулықтарына байланысты мәселелері бар. Тағы осы секілді жағдайларына қарай оларға жан-жақты көмек көрсетілетін болады. Жұмысшы топтың құрамында жұмыспен қамту, білім беру, құқық қорғау органдары, халықты әлеуметтік қорғау, денсаулық сақтау салаларының өкілдері бар.
Сол 12 отбасының бірінің иесі – 36 жастағы азаматтың тұрғылықты тіркелген мекенжайы да, баспана, жұмысы да жоқ. Азаматтық некедегі жұбайы орта білімді, еш жерде жұмыс істемейді. 4 баламен 2 бөлмелі, әбден тозығы жеткен барак типтес үйде тұрады. Ол да өз иеліктерінде емес. 2 жылдан бері төленбеген несиесі тағы бар.
Енді бір отбасы 5 баласымен қоймада тұрып жатыр. Отағасы сол жердің қарауылы болғандықтан, аумағы 12 шаршы метр жалғыз бөлмеде 7 адам күнелтуде. Едені бетон, сыз, суық бөлмеде мүліктен жалғыз кереует бар. Өзгелері сыз тартқан тас еденде жатып ұйықтайды. Балалардың анасы бала күтіміне ай сайын 20 мың теңге, көпбалалы отбасы ретінде 10000 теңге алады. Осыдан басқа түсіп тұрған табыс жоқ.
Аталған қиын жағдайға душар болған отбасыларға тиісті жәрдемақы алуларына және балаларының балабақшаға қабылданып, ересектерінің жұмысқа тұруына және денсаулықтарын күтулеріне пилоттық жоба аясында барынша көмек көрсетілмек.
