Мемлекеттік орман қорын қорғау мен күзету – орман өрттерінің алдын алу, орман ағаштарының заңсыз кесілуіне және ҚР басқа да орман заңдарын бұзушылықтарға қарсы күрес жөніндегі іс-шараларды жүзеге асыру, сондай-ақ орман аурулары мен зиянкестерінен, табиғи сипаттағы қолайсыз факторлардан қорғау болып табылады. Алайда орман қорына үлкен залалын тигізетін орман өрттері туралы айтпай кетуге болмайды.
Осы орайда адам – табиғаттың ажырамас бөлігі. Адамсыз табиғат, табиғатсыз адам өмір сүруі мүмкін емес. Орманның бірден-бір жауы ол – өрт. Жамбыл облысында мемлекеттік орман қоры 4 443 064 га алқапты құрайды. Оның ішінде: орманды алқапты жерлер – 2 361 274 га, ормансыз жерлер – 2 081 790 га.
2018 жылы Жамбыл облысында мемлекеттік орман қоры жерінде орман өрті оқиғасы бойынша жалпы көлемі – 146461,5 га құрайды. Оның ішінде: орманды алқап – 117132,5 га, ал ормансыз жерлер – 29329 га. Яғни мемлекеттік орман қоры жеріне келтірілген шығын 74732,5 мың теңгені құрайды. Орман өртінің шығу себептеріне тоқталсақ, олардың екеуі тұрғындардың кінәсінен болса, ал қалғандары найзағай салдарынан.
Сонымен қатар, Қазақстан Республикасы Ауыл шаруашылығы министрлігі Орман шаруашылығы және жануарлар дүниесі Комитетінің 15 ақпан 2019 жылғы «2019 жылдың өрт қауіпі бар маусымына дайындық жөніндегі міндеттері туралы» бұйрығына сәйкес қазіргі таңда мемлекеттік орман иеленушілер мемлекеттік орман қоры жерінде орман өрт қауіпі бар маусымына дайындық жұмыстары жүргізілуде.
Орман өртінің болуы адам факторларынан туындайды. Яғни ол дегеніміз, орманда шөп шабу, мал жаюға жер телім учаскелерін алған орман пайдаланушылар, демалатын туристердің, жидек және саңырауқұлақ терушілердің, аңшылардың азаматтардың өртке салғырт қарауынан және орман өрттері жөніндегі қағидаларын, өрт қауіпсіздігі ережелерін сақталмағандықтан туындайды.
Сондықтан әр адам мынадай қарапайым қағиданы біліп, сақтағандары жөн:
— құрғақ шөбі бар жерлерде от жағуға;
— кез келген жерде сөндірілмеген темекі тұқылы мен сіріңке қалдықтарын тастауға;
— тез жаңғыш заттар мен материалдарды арнайы қаралмаған жерлерде қалдыруға тыйым салынады.
Егер азаматтар орманда өрт қаупі бар маусымында «Ормандарда өрт қауіпсіздігі ережелерін» сақтамаған жағдайда «Қазақстан Республикасының Әкімшілік құқық бұзушылық туралы» Кодексіне сәйкес айыппұлдар салынатынын ескертеміз.
Облыс тұрғындарына айтарымыз, орманда өрт қауіпсіздігі ережелерін сақтай біліңіздер, отқа абай болыңыздар!
Орман — ел байлығы, денсаулық емшісі. Соны сезініп, табиғат байлығын өз қалпында сақтай білейік.
Е.Алимкулов,
Жамбыл облыстық орман шаруашылығы және жануарлар дүниесі аумақтық инспекциясы Орман және Ерекше қорғалатын табиғи аумақтар бөлім басшысының м.а.
