Биыл облысымыздағы жоғары оқу орындарының төлемақысы өспейді. Бұл туралы өңірлік коммуникациялар қызметінде М.ХДулати атындағы Тараз мемлекеттік университетінің ректоры Махметқали Сарыбеков пен Тараз мемлекеттік педагогикалық университетінің ректоры Ержан Әмірбекұлының қатысуымен өткен баспасөз мәслихатында белгілі болды, – деп хабарлайды «shanyraqinfo.kz» ақпарат агенттігі.
Брифингте алғашқы болып сөз алған Тараз мемлекеттік университетінің ректоры Махметғали Нұрғалиұлы оқу орындарына бөлінген гранттарға тоқталды.
Спикер сонымен қатар, спикер М.Х.Дулати атындағы Тараз мемлекеттік университеті биылғы оқу жылына бакалавриаттың – 60, магистратураның – 40, докторантураның 4 мамандығы бойынша қабылдау жүргізетінін тілге тиек етті.
– Барлық білім бағдарламалары бойынша оқудың төлемақысы өскен жоқ, былтырғы жылдың деңгейінде сақталды. Мысалы, бакалавриатта гуманитарлық, заң, экономикалық ғылымдар бойынша 1 жылдық төлемақы 308 000 теңгені құрайды. Ал, инженерлік, техникалық, технологиялық бағыт бойынша оқудың төлемақысы 318 000 теңге болып бекітілді. Магистратураның 1 жылдық төлемақысы ғылыми-педагогикалық бағыт бойынша – 357 000, бейіндік бағыт бойынша 396 000 теңге. Докторантураның барлық білім беру бағдарламасы бойынша 1 жылдық төлемақы 915 мың теңгені құрайды. 2018 жылы 4 шілдеде жоғары оқу орындарының автономиялық дербестігін кеңейту бойынша қабылданған арнайы заңға сәйкес университеттер оқудың төлемақысын өздері бекітеді, – деді М.Сарыбеков.
Мұнан соң сөз алған Тараз мемлекеттік педагогикалық университетінің ректоры Ержан Әмірбекұлы, әлеуметтік желі арқылы «Білім және ғылым министрлігі жоғарғы оқу орындарының ақысын 20 пайызға көтеруді тапсырды» деген жалған ақпарат жан-жаққа тарап кеткенін және бұл ақпараттың шындыққа жанаспайтынын айтты.
– Бірер күн бұрын барлық отандық арналарда Білім және ғылым министрінің БАҚ-пен байланыс мәселелері бойынша кеңесшісі Ерболат Мұхаметжан аталған ақпарды теріске шығарып, негізсіз екенін мәлімдеді. Өз сөзінде ведомство өкілі қазір елімізде 131 жоғарғы оқу орны барын, олардың көбі жекеменшік екенін айтқан. Олар нарықтың ыңғайына қарай жұмыс істейтінін, министрлік нарық заңдылығына араласа алмайтынын да мәлімдеді. Ол сондай-ақ, студент пен университет арасындағы келісім нормаларына сәйкес кейбір білім мекемелері оқу ақысын шамамен 4-8 пайызға арттырғанын, ал кей білім ошақтары оқу ақысын керісінше 7 пайызға түсіргенін де хабарлады. Осы орайда Тараз Мемлекеттік педагогикалық университеті де оқу ақысын алдыңғы жылдың деңгейінде қалдырғанын ескертемін, – деді университет ректоры.
Брифинг соңында спикерлер БАҚ өкілдері қойған сауалдарға жауап берді.
