Алматы облысында 20 мың халқы бар ауыл таза суға қол жеткізе алмай отыр – депутат

Алматы қаласына іргелес орналасқан Қарасай ауданына қарасты Кемертоған ауылында ауызсу тапшылығы жылдар бойы шешімін таппай келеді. 20 мыңға жуық тұрғыны бар елді мекенде орталықтандырылған су жүйесі бар болғанымен, техникалық жағдайы сын көтермейді. Құбырлардағы қысым тым әлсіз. Кейбір көшелерге мүлде су жетпейді. Тұрғындар тіршілікке қажетті суды түнгі уақытта ыдыспен жинап, күнделікті шаруаларын соған бейімдеуге мәжбүр.

«Қала іргесінде отырсақ та, суды шелектеп тасимыз. Көбіміз құдықтан ішеміз. Жерден 13–14 метр тереңдіктен алынған судың сапасы нашар. Тұнбасы, иісі бар. Мұндай суды ішу түгілі, кір жууға да келмейді. Құбыр тартылғанымен, қысым жоқ. Су тек түнде сыздықтап ағады. Қазір ауылдың тек 20 пайызы ғана орталықтандырылған сумен қамтылған. Біз Қаскелең топтық су құбыры жобасына да кірмейміз. Қазір суды «BeyAzhTrans» ЖШС мен «Таусамалы-Қызмет» МКК жеткізіп отыр. Бірақ олардың ұңғымалары әлсіз әрі тозған. Осы мәселені шындап көтеру үшін AMANAT партиясының Мәжіліс депутаттарын арнайы шақырттық. Олар келіп, халықтың жағдайын көріп отыр», – дейді ауыл тұрғыны, ардагер Егінбек Егеубеков.

Тұрғындардың айтуынша, мәселе тек сумен қамтуда емес, оның сапасында да. Раушан Жұматаева есімді тұрғынның сөзінше, көптеген жеке скважиналар рұқсатсыз қазылып, санитарлық талаптар сақталмаған.

«Бұл судың сапасы өте нашар. Техникалар бұзылады. Батареялар бітеліп, мүлде жарамсыз болып қалды. Ең бастысы – бұл тұрғындардың денсаулығына қауіп төндіреді. Осы мәселені бірнеше рет Мәжілісте көтердік. Енді жобаны қаржыландыру қажет. Құжаттар дайын, сараптамадан өтті. 600 млн теңге жергілікті деңгейде қарастырылған. Бірақ қалған қаражат республикалық бюджеттен бөлінбесе, бұл мәселе тағы ұзаққа созылып кетуі мүмкін», – деді ол.

Мәселені көзбен көріп, тұрғындармен ашық форматта пікірлесу үшін Мәжіліс депутаты, «AMANAT» партиясы фракциясының мүшесі Максим Рожин мен Мәжіліс депутаты Данияр Қасқарауов Кемертоғанға арнайы келді.

Максим Рожиннің айтуынша, бұл мәселе бір жарым жыл бұрын Қаскелеңдегі қоғамдық қабылдауда алғаш рет көтерілген. Сол жолы 20-дан астам түйткіл тіркеліп, соның көбі шешімін тапқан. Ал қазір Кемертоған үшін ең өзекті мәселе – таза ауызсуға қол жеткізу.

«Қазір ауылда 4500-ден астам үй орталық су жүйесіне қосылмаған. Тұрғындар әртүрлі тарифпен, сапасы күмән тудыратын жеке ұңғымалардан су тұтынып отыр. Қажетті құжаттар мен жер телімі дайын. Енді басты мақсат – республикалық бюджеттен қаржы тарту. Бұл мәселе Үкімет қарауына ұсынылды. Премьер-Министр тарапынан бақылауға алынды. Бюджет нақтыланғанда қаржы бөлінуі тиіс. Бұл мәселе «AMANAT» партиясының тікелей бақылауында. Партияның «Халықпен бірге!» сайлауалды бағдарламасында инфрақұрылымды жаңғырту негізгі басымдықтардың бірі ретінде белгіленген», – деді Мәжіліс депутаты Максим Рожин.

Оның мәліметінше, жобалық-сметалық құжаттама аясында жалпы ұзындығы 184,8 шақырым болатын су құбыры, екі резервуар, үш насос станциясы, дизель генераторы және трансформаторлық қосалқы станция салу жоспарланған. Құрылыс аяқталған жағдайда 20 мыңға жуық тұрғын сапалы ауызсумен қамтылатын болады.

Айта кетейік, Қарасай ауданында осыған ұқсас жобалар кезең-кезеңімен жүзеге асып келеді. Қазір Жаңатұрмыс пен Қаратөбе ауылдарында су жүйесінің құрылысы жүріп жатыр. Елтай, Жармұхамбет, Шалқар және Қайрат ауылдарында да жұмыстар басталған. Бұл жобаларға 1,7 млрд теңге бөлінген.