https://www.facebook.com/talastynysy
Қауіпсіз терезе – қауіптің алдын алу
Жаз мезгілінде балалар үшін үйдегі қауіпсіздік мәселесі өзекті бола түседі. Әсіресе, көпқабатты үйлерде тұратын отбасылар үшін терезеден құлау қауіпі арта түседі. Осыған байланысты еліміз бойынша “Қауіпсіз терезе” айлық акциясы өткізіліп жатыр.
Акцияның негізгі мақсаты – ата-аналар мен қамқоршылардың назарын терезе қауіпсіздігіне аудару, балалардың жазатайым жағдайға тап болуын болдырмау.
Статистика не дейді?
Соңғы жылдары терезеден құлау оқиғалары жиілеп кетті. Олардың көпшілігі – ата-аналардың немқұрайлылығы мен қауіпсіздік ережелерін сақтамаудың салдары. Бір ғана сәттік бейқамдық – орны толмас қайғыға әкелуі мүмкін.
Кәмелетке толмағандардың істері және олардың құқықтарын қорғау жөніндегі комиссия ата-аналарға келесі қарапайым, бірақ маңызды ережелерді ұстануды ұсынады:
1. Москит торларына сенбеңіз! Олар баланың салмағын көтере алмайды.
2. Терезеге арнайы құлып немесе бекіткіш орнатыңыз.
3. Баланы терезе алдында қараусыз қалдырмаңыз.
4. Жиһазды (диван, орындық, үстел) терезенің жанына қоймаңыз.
5. Баламен қауіпсіздік туралы жиі сөйлесіп тұрыңыз.
Қауіпсіздік – әр ата-ананың жауапкершілігі. Бала – болашағымыз. Оның амандығы мен саулығы – біздің басты байлығымыз.
Зианат Сейілбек,
кәмелетке толмағандардың істері және олардың құқықтарын қорғау жөніндегі комиссия хатшысы.
