Бүгін орталық «Достық» алаңында Жамбыл облысы әкімінің міндетін атқарушы Нұржан Календеров пен Полиция департаментінің бастығы Арман Оразалиев аудандық полиция бөлімдерінің учаскелік инспекторларына салтанатты түрде жаңа қызметтік автокөліктер тапсырды, – деп хабарлайды «shanyraqinfo.kz» ақпарат агенттігі.
Байзақ, Жамбыл, Жуалы, Қордай, Мойынқұм, Меркі және Шу аудандарының учаскелік полиция инспекторлары су жаңа «Нива» және «Уаз» маркалы 131 бірлік арнайы автокөлікпен қамтамасыз етілді. Ал қалған үш ауданға келесі жылдың 1-жартыжылдығында бөлінетін болады.
– Облыста жалпы қылмыс саны 9 пайызға төмендегенімен, қылмыстық теріс қылықтардың саны өскені бізді алаңдатады. Осы тұрғыдан алып қарағанда, облыстық полиция департаментінің материалдық-техникалық базасын нығайту арқылы қылмыс санының азаюына ықпал етуіміз керек. Жалпы облыс әкімдігі үнемі құқық қорғау органдарымен бірлесе аймақтағы қоғамдық тәртіп пен қауіпсіздіктің сақталуын қамтамасыз етіп келеді. Мәселен соңғы 3 жылда жергілікті бюджеттен полиция департаментіне 19 миллиард теңге қаржы қаралса, биылғы жылдың өзінде 9 миллиард 2 миллион теңге бөлінді. Соның ішінде полиция қызметкерлеріне автокөлік құралдарын сатып алу үшін 486 миллион теңге бөлініп, ол қаржыға осы 131 автокөлік сатып алынды. Бұл өз кезегінде сан түрлі қылмыстар мен орын алатын оқиғалардың санын азайтуға септігін тигізеді деп сенемін.
Бірінші кезкете біз халықпен тығыз қарым-қатынас жасайтын, қоғамдық тәртіптің сақталуына тікелей жауапты учаскелік полиция инспекторларын көлікпен қамтамасыз етуіміз керек еді. Бұл меже орындалу үстінде. Екінші кезекте жол қауіпсіздігін сақтау шараларын күшейту міндеті тұр. Себебі облыс аумағын басып өтетін «Батыс Еуропа – Батыс Қытай» автодәлізінде, облыстың ішкі жолдарында жол ережелерінің қатаң сақталуын іс жүзінде қадағалай алсақ қана қана талай адамның өмірін сақтап қала алатынымыз анық, – деді Нұржан Сәбитұлы.
Келесі кезекте сөз сөйлеген Полиция департаментінің бастығы полиция полковнигі Арман Оразалиев Облыс әкімдігіне Полиция департаментіне материалдық қолдау көрсеткені үшін алғысын білдіре отырып: — Ішкі істер министрлігімен 2020 жыл – «Учаскелік полиция инспекторларының жылы» — деп жарияланды. Осыны ескеріп, Облыс әкімдігінің қолдауымен өңіріміздегі барлық учаскелік полиция инспекторлары автокөлікпен 100 пайызға қамтамасыз етілетін болады. Учаскелік полиция инспекторларына көлік бөлу арқылы олардың шалғай жатқан аудандарға жиі барып тұруына, полицияға түскен шақыруларға дер кезіне жетуіне, отбасылық-тұрмыстық қылмыстарды және басқа да көптеген құқық бұзушылықтарды төмендетуге, сонымен қатар, қылмыстың өсуіне, соның ішінде мал ұрлығына жол бермеуге қол жеткізуге мүмкіндік береді – деп атап өтті.
Келесі кезекте Н.Календеров пен А.Оразалиев учаскелік полицейлерге салтанатты түрде автокөліктердің кілтін табыстап, өз кезегінде инспекторлар аянбай қызмет етуге ант етті.
Шара соңы полицейлердің жүргізуімен жаңа автокөліктердің салтанатты шеруімен аяқталды.
