Сарысу ауданында ауыл шаруашылығы кооперативтерін құру ісі алға басып келеді. «Ауыл шаруашылығы кооперациясы туралы» Заңы қолданысқа енгелі мұндағы агробірлестіктердің саны біршама артқан, – деп хабарлайды «shanyraqinfo.kz» ақпарат агенттігі.
Мәселен, Досбол ауылдық округінен құрылған «JANA KOKDALA» ауыл шаруашылығы кооперативінің төрағасы Талғат Наханов аудандағы ауыл шаруашылығы құрылымдарымен жеке қожалықтардан және өзінен 4000 бас қозыны жинақтап бордақылап «Мерке-ет», «Оңтүстік-халал» ЖШС-нің ет комбинатына өткізіп, экспортқа жібереді. Ал, Тоғызкент ауылдық округіне қарасты «Usharal-Agro» ауыл шаруашылығы кооперативі 20 секциялы мал бордақылау алаңын құрып 3500 бас қойды бордақылап, нарыққа және «Мерке-ет», «Оңтүстік-халал» ЖШС-нің ет комбинаттары арқылы экспортқа жібереді.
Сол секілді, Жаңаталап ауылдық округінен «Жантөре-Саудакент» ЖШС директоры Медеу Шаханов 100 гектар жерге тамшылатып суғару жүйесін енгізген. Ол жерге көкөніс, жүгері және бақша өңімдері егілген. Алынған өнімді сақтау мақсатында 150 тонналық қойма салып мұздатқыш қондырғыларын орнапақ. Сонымен қатар өзінде бар мүмкіндіктерді пайдалана отырып, мал азығы ширатпа жем шығаратын цех ашуды жоспарлауда. Соның нәтижесінде тұрақты 15 адамды жұмыспен қамтиды. Ал науқан кездерінде еңбекшілердің саны 160-200 адамға дейін жетеді.
Түркістан ауылдық округіне қарасты «Бәйімбет» шаруа қожалығының төрағасы Ғалымжан Қайсарбеков болса шаруа қожалығы негізінде ауыл шаруашылығы кооперативін құрып, құрама жем дайындау цехін Жаңатас қаласынан ашуды көздеп отыр. Оған қажетті құрылғылар Қытайдан сатып алынып, орнатылу үстінде. Ал шикізат Жаңарық, Түркістан ауылдық округтеріндегі шаруа қожалықтарынан және жеке тұрғындардан алынады.
Сонымен қатар Түркістан ауылдық округіндегі «Түркістан» ауыл шаруашылығы кооперативінің төрағасы М.Сейлбеков арнайы сүт сақтайтын танкер сатып әкелгенін айта кеткен жөн. Қазіргі таңда ауылдық округтен сүт өнімдерін жинақтап Жаңатас қаласында жаңадан ашылатын сүт цехына өткізу үшін ұйымдастыру жұмысы жүргізілуде.
– «Бірлік бар жерде, тірлік бар». Қашанда бірлесіп бас қосып, кооперативтер құру заман талабы. Қазіргі кез жұмыла еңбек ететіндердің заманына айналуда. «Жаяудың шаңы, жалғыздың үні шықпас» дегендей қандай бір істе болмасын жалғыз айналысқаннан гөрі, бірлесе шешкен іс тиімді болмақ.
Бүгінде табиғаты ерекше, облыс орталығынан шалғайда орналасқан біздің аудан тұрғындарының басым бөлігі ауыл шаруашылығымен айналысады. Шаруа қожалықтарының кооперативтерге бірігуі маңызды шара, осыған орай ауданда кооперативтер құру жөнінде белсенді жұмыстар жалғасын табуда, – дейді аудан әкімдігі ауыл шаруашылығы бөлімінің басшысы С. Дариябеков өңірдегі ілкімді істер жайында.
