Мемлекетіміздің тыныштығы мен халқымыздың бейбіт өмірі, амандығы – бәрінен қымбат. Әрдайым аудан халқының тыныштығын қырағы күзетіп, оны қорғауға және қылмыстардың белең алуына тойтарыс берудегі учаскелік полицияның рөлі ерекше.![]()
Бүгін аудандық мәдениет үйінде «Үздік учаскелік полиция инспекторы» конкурсының қорытындысы өтті. Шараның ашылуына қатысқан аудан әкімінің орынбасары Нұрлан Молдабеков сөз сөйлеп, учаскелік полиция инспекторларының кәсіби шеберлігін, қызметтік тәртіпті сақтауын және халықпен өзара әрекет деңгейін арттыру мақсатында өтіп жатқан конкурстың маңыздылығына тоқталды. 
Айта кетейік, аптаның басында басталған конкурсқа қатысушылар дене шынықтыру және нормативтік құқықтық актілері бойынша тест тапсыру сынақтарынан өткен болатын.Тартысты өткен сайыс қорытындысы бойынша 1 — орынды Жаңатас қаласы №3 шағынауданның учаскелік инспекторы Талғат Арқабаев, 2 — орынды Байқадам ауылдық округінің учаскелік инспекторы Мұсаев Руслан, 3 — орынды Жаңатас қаласы №1 және №4 шағынаудандардың учаскелік инспекторы Жандос Амангелдиев жеңіп алса, «Тәулік бойы қызметте» номинациясымен Жаңатас қаласы № 3 шағынауданның учаскелік инспекторы Абзал Асаубай, «Үздік тәлімгер» Жаңатас қаласы № 3 шағынауданның учаскелік инспекторы Аслан Жақыпбеков, Жаңатас қаласы №5, №6 шағынаудандар мен Шанхай елдімекеннің учаскелік инспекторы Әділет Елеубаев пен Жаңатас қаласы №3 шағынауданның учаскелік инспекторы Асхат Айтжан арнайы номинациялармен марапатталды. Жеңімпаздар мен жүлдегерлер ұйымдастырушылар тарапынан дипломмен және бағалы сыйлықтар тапсырылды. Марапатты аудан әкімінің орынбасары, комиссия төрағасы Ерлан Ермағанбетов табыстады. Байқауда аудандық мәдениет үйінің әншілері патриоттық әндер шырқап, көпшіліктің ықыласына бөленді.