Ағымдағы жылдың алты айының қорытындысы бойынша облысымызда барлығы 41 өрт оқиғасы тіркелген. Осыған орай, аймақта орман өртінің алдын алу жұмыстары күшейтіліп, сақтық шаралары қарқынды жүруде, – деп хабарлайды «shanyraqinfo.kz» ақпарат агенттігі.
Былтырғы жылы облысымызда 146 мың гектар жер өртке оранған. Нәтижесінде, аталмыш көрсеткіш бойынша республика көлемінде бірінші орынға шыққан едік. Сондықтан биыл мамандар өрт оқиғаларының алдын алуға барын салуда.
Алғашқы жартыжылдықтың қорытындысы бойынша тіркелген 41 өрт фактісінің тек 3-еуі ғана орман алқабына тиесілі. Қалғандарының барлығы аудан әкімдіктеріне қарайтын жерлерде тіркелді. Ол аумақтарда жергілікті билікпен жұмыс жасап, өртті өшіруге күш салынуда. Нәтижесінде жыл басынан бері 1 266 гектар орман жерлері мен 59,2 гектар ормансыз алқаптарда орын алған өрт оқиғалары ауыздықталды. Қазірге келтірілген шығын 962,4 мың теңгені құрап отыр.
Сонымен қатар, биыл Ауыл шаруашылығы министрлігінің «Мемлекеттік орман иеленушінің орман өрт стансасы» туралы Ережесін басшылыққа ала отырып, орманшылардың штаттық бірлігі 100 адамға арттырылған. Нәтижесінде құрамы 9 маманнан тұратын 14 бірлік ІІ типтегі және 4 орманшыдан құралған 32 бірлік І типтегі стансалар жұмысын бастады. Соның арқасында бүгінде орман қоры аумағында 254 маманымыз қырағы қызмет атқаруда.
Бұдан бөлек орманшылар 34 өрт бақылау мұнарасымен қамтылған. Сондай-ақ орман қорына кіретін жолдарға 15 қадағалау-тексеру бекеттерін орнатып, 13 бекетте стационарлық рациялы байланыс ұйымдастырылыпты.
Қазір жалпы салаға 216 рациялық байланыс техникасы енгізілсе, оның 65-і стационарлық, 39-ы автомобильді және 112-сі қолға ұстап жүруге арналған қондырғы.
Тағы бір қуанарлық жағдай, биыл мамандарымыз 4 өрт сөндіру автокөлігімен, 12 Уаз-330365 АЦ-0,9 маркалы кіші кешенді техникасымен, 51 дана МТЗ тракторлы соқамен және 14 жартылай тіркемелі 3 тонналық әмбебап цистернамен қамтамасыз етіліп отыр. Ал орман алқабын бақылауға 73 дана жеңіл автокөлік пен 20 мотоцикл жұмылдырылған. Қызметкерлердің 1 098 бастапқы өрт сөндіруге қажетті құрал-саймандары сақадай сай дайын тұр.
Нәтижесінде 2017 жылы орман мекемелерінің материалдық-техникалық базасы 41,2 пайызды ғана құраса, биыл бұл көрсеткіш 66 пайызға жетіп отыр. Бұған биыл мемлекет тарапынан қаралған 515 миллион теңгенің мақсатты жұмсалуының арқасында қол жеткізілген.
