istockphoto.com
https://turkystan.kz/article/266184-symkentte-zylu-bagasy-23-paiyzgaga-qymbattaidy
Қалада алдағы жылыту маусымына дайындық жұмыстары аяқталуға жақын. «3-Энергоорталық» АҚ қазандары мен турбиналарына жүргізілген негізгі күрделі жөндеу жұмыстары аяқталды, деп хабарлайды turkystan.kz сайты Otyrar.kz-ке сілтеме жасап.
Қазір кәсіпорын қыста тұрақты жылумен қамтамасыз ету тетіктерін пысықтап жатыр.
Биыл жылыту маусымына дайындық үшін шамамен 190 миллион теңге бөлінген. Бұл қаржы жабдықтарды жаңғыртуға, жаңа қондырғылар сатып алуға, реконструкция мен техникалық қызмет көрсетуге жұмсалды. Жоспарланған жұмыстардың басым бөлігі аяқталды.
— Екі қазандықтың күрделі жөндеуі аяқталды, қазір үшіншісі іске қосылды. Сонымен қатар бірінші және екінші турбиналарға ағымдағы жөндеу жүргізілуде. Желдету қоршауын жөндеу жұмыстары жүріп жатыр, оны тамыз айының соңына дейін аяқтауды жоспарлап отырмыз. Қалған жұмыстарды 20–30 қыркүйек аралығында бітіреміз. Жылыту маусымы басталғанға дейін бәрі дайын болады, — деді бас инженер Бақыт Жолдыбаев.
Сапалы жылу қымбаттайды. Шымкентте жылумен қамтамасыз ету тарифін көтеру жоспарланып отыр.
— 1 тамыздан бастап тарифтерге өзгеріс енгізілді. Бұл газ бағасының өсуіне және статистика бойынша тауарлар құнының қымбаттауына байланысты. Соның нәтижесінде жаңа тариф ҚҚС-сыз 1 гигакалория үшін 7230 теңге деңгейінде бекітілді — бұл бұрынғыдан 23%-ға жоғары, — деп атап өтті Табиғи монополияларды реттеу комитетінің Шымкент қаласы бойынша департаментінің бас маманы Жарқынбек Шынықұл.
Мамандар тарифтерді қайта қарау жабдықтарды уақытылы жаңғырту және қыста сенімді жылумен қамтамасыз ету үшін қажет екенін айтады. Бұл шара әсіресе 2024 жылы Риддер жылу электр орталығында болған резонансты жағдайдан кейін өзекті болып отыр. Ол жерде тозған желілердің кесірінен ірі апат болып, қақаған қыста қала жылусыз қалған еді.
Толық нұсқасына гиперсілтеме беруді ұмытпаңыз: https://turkystan.kz/article/266184-symkentte-zylu-bagasy-23-paiyzgaga-qymbattaidy
