2025–2027 жылдары Жамбыл облысында жалпы құны 300 млрд теңгеден асатын 20 ірі агрожоба жүзеге асырылады. Бұл бастамалар өндірісті жаңғыртуға, инновациялық технологияларды енгізуге және өңірдің экспорттық мүмкіндіктерін кеңейтуге бағытталған.
Жаңа дақылдарға да ерекше назар аударылып отыр. Өңірде алғаш рет 15 гектарға соя, 238 гектарға бұршақ (фасоль) дақылы егілді. Ол үшін Мексикадан элиталық тұқымдар жеткізілді.![]()
Сонымен қатар дәстүрлі бағыттар да қолдаусыз қалған жоқ. 25 қыркүйекте Байзақ ауданында қуаттылығы 1 миллион тонна болатын заманауи қант зауытының құрылысы басталады. Бұл жоба өңірдің қант қызылшасын өндіру саласын дамытуға тың серпін бермек.
Жалпы, облыстың аграрлық секторы тұрақты өсім көрсетіп келеді. 2025 жылы ауыл шаруашылығын дамытуға 48,2 млрд теңге бөлінді (+26,8%). Биылғы жылдың 8 айында диқандар 214,2 млрд теңгенің өнімін өндірді. Егіс алқаптарының көлемі 640 мың гектарға дейін ұлғайып (+14 мың га), биылғы күтілетін өнім шамамен 3,8 млн тоннаны құрайды.
– Ауыл шаруашылығы Жамбыл облысы экономикасының негізгі қозғаушы күшіне айналуда. Біз тек өндіріс көлемін ұлғайтуды ғана емес, өңірді аграрлық инновациялар орталығы ретінде нығайтуды да мақсат етіп отырмыз, – деді облыстық ауыл шаруашылығы басқармасының басшысы Қайрат Көшенов.Жамбыл облысының әкімдігі
