Мойынқұм ауылында ауыз су құбырының тесілуіне байланысты уақытша қиындықтар туындады. Құбыр жүйесіндегі ақау салдарынан ауылға орталықтандырылған ауыз су беру тоқтады. Мамандардың айтуынша, мәселені жалғап, жүйені қайта іске қосу үшін бірнеше күн уақыт қажет болады.
Осыған байланысты аудан әкімі Ермек Амангелдіұлы Карентаев шұғыл жиналыс өткізіп, жауапты сала басшыларына нақты тапсырмалар жүктеді. Ең басты мақсат – ауыл халқын ауыз сусыз қалдырмау. Әкімдік тарапынан ұйымдастырылған арнайы көліктер арқылы ауыл тұрғындарына су жеткізіліп жатыр. Бұл жұмыс күнделікті бақылауда болып, әр отбасының қажеттілігіне қарай су үлестірілуде.
Айта кету керек, қазіргі қолданыстағы құбырлар 1989 жылы салынған. Шойын құбырлардың қызмет ету мерзімі әдетте 60-80 жылға дейін жетеді. Алайда сол кезеңде жалғанған кейбір тұстары темірмен дәнекерленген екен. Ал темірдің жарамдылық мерзімі қысқа әрі жердің тұзды топырағы (сор) бұл процесті жылдамдатып, құбырдың тез тозуына әкеліп отыр.
Өткен жылы құбырларды толық жаңарту үшін облыс әкімдігіне қаржы бөлу жөнінде ұсыныс жасалғанымен, мәселе шешімін таппай қалған. Қазір аудан әкімдігі бұл проблеманы түбегейлі шешу жолдарын қарастырып, тиісті орындарға қайтадан ұсыныс түсіріп отыр.
Жергілікті билік өкілдерінің айтуынша, басты мақсат – халықты сапалы ауыз сумен үздіксіз қамтамасыз ету. Сондықтан да уақытша қиындықтарға қарамастан, құбырды қалпына келтіру жұмыстары тоқтаусыз жүріп жатыр. Мойынқұмдықтар үшін әкімдік тарапынан бар жағдай жасалып, әрбір тұрғынға қажетті ауыз су жеткізілетініне кепілдік берілуде.
