Су – тіршілік көзі. Онсыз қоғамды елестету әсте мүмкін емес. Осыны басты назарда ұстаған Т.Рысқұлов ауданының әкімдігі соңғы 3 жылда 14 елді мекенге таза ауыз су тарту жобаларын іске асырды. Жалпы 25 мыңнан астам тұрғынды қамтыған бұл жобаларға бюджеттен 4,5 млрд. теңге бөлінген. Аудан әкімі өңір тізгінін 2022 жылдың маусым айынан бастап ұстады. Дәл осы жылы аудандағы 3 ауылға тіршілік нәрі тартылды. Соның бірі – Жаңатұрмыс ауылдық округі.
Жаңатұрмыс ауылдық округіндегі су ғимараты 2022 жылдың мамыр айында нақты пайдалануға берілді. Мұндағы құрылыс жұмыстарына бюджеттен 414 млн. теңге бөлінген. Бүгінде бұл тіршілік нәрі ауылдағы 420-дан астам аулаға таратылуда. Дәл осы жылы тіршілік көзіне Қазақ және Сәлімбай ауылының тұрғындары да қол жеткізді. Қос бірдей жобаға бюджеттен 800 млн. теңгеге жуық қаржы бөлінген. Жалпы 3 ауылдағы ауыз сумен қамтылған халық саны 4304 адамды құрайды.
Халық саны 200-ге жетпейтін елді мекендер «болашағы жоқ ауылдар» санатына жатқызылады. Дегенмен аудан әкімі Ернар Есіркепов аталмыш ауылдарды назардан тыс қалдырмай, әр шағын ауылға кешенді модульді блоктар орнатты. Таза ауыз су тарататын бұл қондырғылар Сұмқайтты, Әбілхайыр, Қосапан және Қорағаты ауылдық округтеріне қарасты Тойқұдық, Мамыртөбе, Аққайнар сынды елдімекендерге де қойылды. Бұл жұмыстарға бюджеттен әр қондырғыға 30 млн. теңгеден астам қаржы жұмсалған.
Аудан әкімінің назарынан шалғайда жатқан ауылдарда тыс қалған жоқ. Олардың қатарында Сөгеті және Мамай ауылдары да бар. Талай жылдан бері тіршілік көзінен тартқан тұрғындар ауылда атқарылған толымды тірліктерге дән риза.
Мамай ауылының тұрғындары талай жылдан бері көшедегі құдықтан су алып, ішіп келген. Оның өзі бір ғана сағатқа ағатын болған. Дәл қазір су жүйелері әрбір аулаға кіргізіліп, тұрғындарға тіршілік нәрі таратылуда.
– Үйімізге су кіргізіп алдық. Аллаға шүкір, қаладан еш жеріміз кем емес. Газымыз да бар. Ернар Есіркепов ауданға әкім болып келгелі жағдайымыз жақсарды. Айтар алғысымыз шексіз. Мемлекет басшысына да, облыс әкіміне де үлкен алғыс, – дейді Мамай ауылының тұрғыны Алпысбай Құрбанов.
Жаздың аптап ыстығында ауыз су мәселесі айтарлықтай күрделене түсетіні белгілі. Өйткені Құландағы 20 000-ға жуық тұрғынды осы күнге дейін бір ғана су ғимараты ауыз сумен қамтып келген. Соңғы жылдары орталықта халық саны да, аула саны да артып келеді. Жаңа үйлер бой көтеріп, көпқабатты баспаналар көбеюде. Осыны ескерген аудан басшысы «Арай» тұрғын үй алқабынан құны 559 млн. теңге болатын жаңа су имаратының құрылысын бастауға пәрмен берді. Бүгінде бұл жұмыс өз мәресіне жетіп, іске қосылуға жақын.
Мемлекеттік бағдарламалардың шарапатынан шөңгерліктер де шет қалған жоқ. Бүгінде 213 тұрғыны бар Шөңгер ауылына да жаңа ауыз су имараты салынуда. Жуық арада бұл жұмыстар толық аяқталып, ел игілігіне берілмек.
Таза ауыз суды Ақбұлақ ауылдық округіне қарасты Р.Сәбденов ауылының тұрғындары да көптен күтіп келеді. Халық үніне құлақ асқан жергілікті атқарушы билік су жүйелерін тарту жұмыстарын жүргізіп жатыр. Жобаның жалпы құны 982 млн. теңгені құрайды. Құрылыс жұмыстарын бүгінде «Таразстрой – 2004» ЖШС жүзеге асыруда.
Ауыл тұрғындары үшін ауыз сумен қатар таудан келетін ағын су мөлшеріде – өзекті мәселе. Бұл олқылықты реттеу үшін ауданда «Қарақат» су каналы да ретке келтірілді. Ағын су мөлшерін молайту жұмыстары алдағы уақытта да жалғасады. Келешекте дәл «Қарақат» каналы секілді тағы 5 каналдың құрылысын жүргізу жоспарлануда.
Бұл аудан халқының денсаулығына, өмір сапасының жақсаруына, болашағына жасалған, сондай-ақ, аудан әкімі Ернар Есіркеповтің сайлауалды бағдарламасында көрсетілген нақты қадамдар. Осылайша соңғы үш жылда 14 елді мекен ауыз сумен қамтылып отыр. Бұл – Президент пәрмені мен тапсырмасының нақты орындалуы.
