Тараз қаласының әкімі Бақытжан Орынбеков шаһардағы бірқатар нысанды аралады. Ең әуелі шаһар басшысы «Таза Қазақстан» республикалық экологиялық акциясы аясында ұйымдастырылған жалпықалалық сенбілікке қатысып, тұрғындармен тілдесті.
Шаһар басшысы өз сөзінде қала тазалығы баршаға ортақ екенін айтып, жұртшылықты сенбілікке белсене атсалысуға шақырды. Шараға мемлекеттік мекемелердің қызметкерлері, кәсіпкерлік нысандардың жұмысшылары, жастар ұйымдары мен еріктілер қатысып, «Алатау» (8) шағынауданы аумағында кең көлемді тазалық жұмыстарын жүргізді. Сенбілікке 10-ға жуық техника тартылып, нәтижесінде 80 текше метр күл-қоқыс шығарылды. Сонымен қатар шаһар аумағындағы бекітілген учаскелерде талдарды балақтау, шөп ору жұмыстары жүйелі түрде атқарылды.
Бұдан кейін Бақытжан Әмірбекұлы «Жасыл Ел-Тараз» мекемесінің жұмысшыларымен кездесіп, қысқы мерзімге дайындық барысымен танысты. Шаһар басшысы мекеме тарапынан атқарылып жатқан жұмыстардың жай-күйін бағамдап, алдағы маусымға қажетті шараларды пысықтады. Сондай-ақ жүздесу барысында жұмысшылардың еңбекақысына қатысты мәселе қозғалды. Қала әкімі бұл мәселені назарға алып, алдағы уақытта тиісті шешімін табатынын атап өтті.
Келесі кезекте «Мыңбұлақ» (9) шағынауданында салынып жатқан балалар ойын алаңшасына барған шаһар басшысы нысанның сапасын көріп, сол бойынша жауаптыларға бірқатар тапсырмалар жүктеді. Сондай-ақ шағынаудан тұрғындарымен кездесіп, олардың ұсыныс-пікірлерін тыңдаған Б.Орынбеков айтылған мәселелер кезең-кезеңімен шешілетінін жеткізді.
Осы ретте айта кетерлігі, өткен жылы аулаларды абаттандыру, оның ішінде балалар ойын алаңшасын салуға қала бюджетінен 500 миллион теңге бөлініп, 24 аула абаттандырылды. Биыл да 768,7 миллион теңгеге 25 ауланы абаттандыру жұмысы жүргізіліп жатыр. Оның 24-і – мемлекет есебінен, біреуі жеке кәсіпкердің қолдауы арқылы жүзеге асырылуда.
Сонымен қатар Бақытжан Әмірбекұлы «Ұлы дала» (15) шағынауданында жүргізіліп жатқан жол құрылысы мен жаяу жүргіншілер жолдарын салу, сондай-ақ көше жарығын орнату жұмыстарының жай-күйімен танысты. Шаһар басшысы жауаптыларға жұмыстың сапасын бақылауды күшейтіп, белгіленген мерзімде аяқтауды тапсырды. Аталған аумақтан А.Асқаров көшесіне өтетін «Қапал» каналы үстіндегі автокөлік көпірінің құрылыс барысы да назардан тыс қалмады.
Жалпы, кейінгі 3 жылда Тараз қаласында 420 көшеге асфальт төселді. Мәселен, биыл Рысбек батыр, А.Асқаров көшелерін қайта жаңғырту жұмыстары жоспарланып отыр. Сонымен қатар 96,7 шақырымды құрайтын 113 көше мен жаяу жүргінші жолдары орташа жөндеуден өтті. Бұдан бөлек, 20 саяжайдағы ұзындығы 34,6 шақырымды құрайтын 100 көшеге шағал төселді. Сондай-ақ осы жылы 85 көшеге түнгі жарық шамдарын орнату көзделген болатын. Оның ішінде 67 көшенің жұмысы биыл аяқталса, 18 көше – 2026 жылға өтпелі.
