ҚР Мемлекеттік қызмет істері агенттігінің Жамбыл облысы бойынша Департаментімен ҚР Президенті Қасым-Жомарт Тоқаевтың сайлауалды тұғырнамасы мен «Бірге» жалпыұлттық акциясының барысында келіп түскен ұсыныстарды жүзеге асыру мақсатында «Бірге – дамыған мемлекеттік қызмет» тақырыбында «дөңгелек үстел» отырысы өткізілді, – деп хабарлайды «shanyraqinfo.kz» ақпарат агенттігі.
Іс-шараның мақсаты – мемлекеттік қызметті дамыту мәселесін қарау, пікір-ұсыныстарыңызды тыңдау, Департаменттің жұмысын жандандыру, сондай-ақ қоғаммен кері байланысты арттыру.
«Дөңгелек үстел» жұмысына әдеп жөніндегі кеңес мүшелері, мәслихат депутаттары, мемлекеттік органдардың басшылары мен қызметшілері, БАҚ, қоғамдық ұйымдары өкілдері қатысты.
Кездесу барысында Жамбыл облыстық аумақтық кәсіподақтар бірлестігінің төрағасы, Жамбыл облысы маслихатының депутаты, Әдеп жөніндегі кеңестің мүшесі Мейрамбек Төлепберген, «Қазфосфат» жауапкершілігі шектеулі серіктестігінің бас директоры, ҚР Кәсіпкерлер Палатасы Президиумының мүшесі, Жамбыл облысының кәсіпкерлер палатасының аймақтық кеңесінің төрағасы, Әдеп жөніндегі кеңестің мүшесі Мұқаш Ескендіров мемлекеттік қызметшілердің моральдік бейнесі туралы сөз қозғады.
Мемлекеттік басқару жүйесіне меритократия негізінде тек лайықты, білімді адамдар келу қажеттігі жөніндегі Президенттің қойған міндетіне сәйкес кадрларды іріктеуге үлкен мән берілуде. Осы орайда өз пікірімен «Үздік мемлекеттік қызметші» атты республикалық байқаудың жеңімпазы Жуалы ауданы Шақпақ ауылдық округінің әкімі Мұстафа Бектұрғанов бөлісті.
Жиын соңында, Департамент басшысы Равиль Төлебаев атқарылған жұмыстар мен алдағы қойылған мақсаттар туралы айтып, қатысушылардың тарапынан қойылған сауалдарға жауап берді, сондай-ақ түскен ұсыныстарға қолдау көрсетті.
Естеріңізге сала кетейік, «Бірге» жалпыұлттық акциясының барысында облыс бойынша 32 мыңнан аса ұсыныс-тілектер жинақталып, арнайы сайтқа енгізілген болатын. Ұсыныстардың дені жұмысқа орналасу, атаулы әлеуметтік көмек алу, коммуналдық төлемдер мен әлеуметтік мәселелер. Сонымен қатар «тілектер» тізімінде шалғай елді мекендерге ауызсу мен газ тарту мәселелері де бар.
