Шерхан Мұртаза атындағы Руханият және тарихтану орталығында белгілі тарихшы, ҚР Журналистер одағының мүшесі Мадияр Ералыұлының «Таңбалы тарих» атты жаңа кітабының таныстырылымы өтті.
Бұл туынды – Әулиеата өңірінің ХХ ғасырдың 30-жылдарындағы тағдырлы кезеңдерін мұрағат деректері арқылы зерттеген маңызды еңбек. Автор байларды тәркілеу, ұжымдастыру науқаны, халық көтерілістері мен ашаршылық зұлматы сияқты ел тарихындағы ең ауыр оқиғаларды нақты архив материалдары негізінде саралаған. Кітапқа ҚР Президенті архиві, ҚР Орталық мемлекеттік архиві және ҚР Ұлттық кітапханасының қорларынан алынған тың деректер енгізілген.
Іс-шараны орталық директоры Жасұлан Әбдіхалық ашып, еңбектің ғылыми және тәрбиелік маңыздылығына тоқталды. Ол «Тарихты білу – елді сүюдің бір көрінісі. Мұндай еңбектер жас ұрпақтың тарихи санасын қалыптастыруға зор үлес қосады» деп атап өтті.
Кітаптың мазмұны мен құрылымы жөнінде өңірдегі бірқатар ғалымдар мен сала мамандары өз пікірлерін білдірді. Атап айтар болсақ,
Филология ғылымдарының докторы, профессор, «Дулатитану және өңір тарихы» ғылыми-зерттеу орталығының Бас ғылыми қызметкері Сәмен Құлбарақ еңбектің тілдік және баяндау ерекшеліктерін айта келе, кітаптың ғылыми дәйектілігіне жоғары баға берді.
Тарих ғылымдарының кандидаты, Ш.Уәлиханов атындағы Тарих және этнология институтының Астана қаласы филиалының директоры Құралай Сәрсенбина онлайн байланыс арқылы сөз сөйлеп, кітаптың деректік құндылығы мен әдістемелік ерекшелігіне тоқталды.
Сондай-ақ тарихшы-археолог, Тарихи ескерткіштерді қорғау және қалпына келтіру дирекциясының директоры Сауран Қалиұлы, облыстық мемлекеттік архивтің бөлім меңгерушісі Сағындық Зейноллаұлы, архив саласының тәжірибелі маманы Назым Қожамар еңбектің ғылыми айналымға қосқан үлесін ерекше атап өтті.
Таныстырылым барысында «Таңбалы тарих» кітабының негізгі тақырыптарын қамтитын бейнеролик көрсетіліп, қатысушыларға еңбектің мән-маңызы кеңінен таныстырылды. Автор Мадияр Ералыұлы сөз алып, бес жыл бойы жүргізілген ізденіс жұмыстарының нәтижесінде жинақталған материалдар жөнінде айтып өтті.
Іс-шара соңында «Кітап – қазына, ал қазына сандықта жатады» деген жақсы дәстүр жалғасын тауып, кітаптың ресми таныстырылымы өткізілді.
«Таңбалы тарих» еңбегі – өңір тарихының көмескі беттерін ашып, келер ұрпаққа тарихи сабақ боларлық мол мұра қалдырған ғылыми еңбек. Кітап «Әулиеата – кітап оқитын өңір» жобасы аясында жарық көріп, оқырманға жол тартты.
Ғазиза Ақмахан
Ш.Мұртаза атындағы руханият және тарихтану
орталығының бөлім меңгерушісі
