Талас ауданы тұрғындарының назарына!
2025 жылдың 1 қыркүйек пен 31 желтоқсан аралығында 18-27 жас аралығындағы азаматтарды күзгі мерзімді әскери қызметке шақыру жұмыстары жүргізілуде.
Бауыржан Момышұлы атамыздың «Отан үшін отқа түс – күймейсің!» — деген сөзін еш уақытта естен шығармауымыз тиіс. Отан алдындағы борышты өтеу – әр ер азаматтың ең алғашқы міндеттерінің бірі екенін білеміз. Ата-бабаларымыз ақ білектің күшімен, ақ найзаның ұшымен жанын салып қорғаған атамекенімізді жау тұяғына таптатпай, қаз-қалпында келер ұрпаққа мұра етіп қалдыру біздің де парасатты парызымыз екені анық. Осы тұрғыдан алғанда Отан алдындағы айбынды борышты өтеу ең алдымен — міндет һәм абырой.
«Әскери қызмет және әскери қызметшілердің мәртебесі туралы» Қазақстан Республикасы Заңының баптары негізінде шақыру учаскесіне тіркелген Қазақстан Республикасының азаматтары 18 жасқа толғаннан кейін шақырылушы болып табылады. Мерзімді әскери қызметке шақырылған азаматтар елдің барлық өңірлерінде қызмет ете алады. 2025 жылғы күзгі мерзімді әскери қызметке шақыру науқанында Тараз қаласы, Меркі ауылы, Т.Рысқұлов ауылындағы әскери бөлімдерде қызмет ету мүмкіндігі бар.
Әскерге шақырылушыларды хабардар ету үрдісі біртіндеп цифрлық форматқа көшіріліп жатыр. 1414 сервисі арқылы әскерге шақырылушыларға смс хабарлама жолданған жағдайда ер азаматтар медициналық тексеруден өтуге шақыру пунктіне келуі қажет.
Медициналық комиссия мен әскери қызметтен жалтару әкімшілік және қылмыстық жауапкершілік ретінде қаралатынын еске салды. Шақыру қағазы бойынша медициналық тексеруге келмеген жағдайда 5 АЕК мөлшерінде айыппұл салынады.
«Әскери қызметтен жалтару 1 мың АЕК мөлшерінде айыппұл салуға не сол мөлшерде түзету жұмыстарына не 400 сағатқа дейінгі қоғамдық жұмыстарға тартуға, не бір жылға дейінгі мерзімге бас бостандығын шектеуге немесе одан айыруға әкеп соғады. Мерзімді әскери қызмет өткеру кезінде мерзімді әскери қызметке шақырылған ер азаматтардың несиесі 14 айға дейін кейінге қалдырылады. Сонымен қатар әскерге барып келген ер азаматтар жоғары оқу орындарында тегін мемлекеттік грант иегері бола алады және өзі қалаған әскери бөлімде Отан алдындағы борышын өтеп келе алады.
Толық ақпаратты білгіңіз келсе Қаратау қаласының қорғаныс істері жөніндегі біріктірілген бөліміне хабарласыңыз.
Қаратау қаласы, Қонаев көшесі, №13, телефон: 6- 19-82.
Р.МҰСТАФАЕВ,
Қаратау қаласының қорғаныс істері жөніндегі біріктірілген бөлім бастығы.
