Қазақстан Республикасы Президентінің 1995 жылғы 19 қазанындағы Жарлығымен мемлекеттік органдар жүйесінде Төтенше жағдайлар жөніндегі мемлекеттік комитет құрылды. Бұл жылдар Төтенше жағдайлар Министрлігі жүйесінің қалыптасу, даму және жетілу кезеңі болды. Қазіргі таңда тамырын тереңге жайған бұл саланың өзіне бағынышты аумақтық органдары, құрылымдары барлық облыс, қала,ауыл – аймақтарда жасақталған. Заманның түрлі қажеттіліктеріне байланысты азаматтық қорғаныс пен төтенше жағдайлар саласының сан алуан қызметтері құрылып, жұмыс жасап келеді.
19 қазан — Қазақстан Республикасының Төтенше жағдайлар қызметінің 30 жылдық кәсіби мерейлі мерекесіне орай, аудандық мәдениет үйінде салтанатты жиын өтті. Салтанатты шара Мемлекеттік Гимнмен ашылды. Лэд экранда «Аудандық төтенше жағдайлар бөлімінің қызметкерлерінің авариялық құтқару қызметі» туралы видеоролик көрсетілді. Шараға қатысқан аудан әкімі Сәкен Мамытов құттықтау сөз сөйлеп, Төтенше жағдайлар қызметінің қызметі қашан да жоғары бағаланатынын айтты.Ауданымыздың әлеуметтік- экономикалық дамуына қосып жүрген үлесі үшін бірқатар сала мамандары мен ардагерлері «Ауданға сіңірген еңбегі үшін» төсбелгісімен, аудан әкімінің, Құрмет грамотасы мен Алғыс хаттарымен марапатталды. Мұнан соң аудандық мәслихаттың аппарат басшысы Бақыт Жұмағұлов сала мамандарына аудандық мәслихаттың Құрмет грамотасы мен Алғыс хаттарын тапсырды. Аудандық төтенше жағдайлар бөлімінің басшысы Алмаз Мелдеев ҚР Төтенше жағдайлардың алдын алу жөніндегі министрліктің 10 қазан 2025 жылғы арнайы бұйрығы негізінде аудан басшысына «ҚР төтенше жағдайлардың алдын алу жөніндегі министрліктің құрылғанына 30 жыл» мерекелік медалін тақты.Марапаттар мұнымен тоқталмады. Аудан әкімдігінің тарапынан аудандық Төтенше жағдайлар бөлімінің ұжымына 30 арнайы жұмыс формасын тарту етілсе, «Қазфосфат» ЖШС-нің Құтқару бекеті мен «Орталық» көлі демалыс орнының құтқарушы ұжымына сый-сияпат жасалды.Ел игілігі үшін аянбай еңбек етіп жүрген азаматтарға арналған салтанатты жиын концерттік бағдарламаға ұласып, аудандық мәдениет үйінің әншілері патриоттық рухта ән шырқаса, «Айжанқыз» халықтық бишілер ұжымы мың бұрала биледі.