Тараз қаласындағы Қазақстан халқы Ассамблеясының Достық үйінде «Өзгеру жолында: жатыр мойны обырын жою мақсатында АПВ-ға қарсы вакцинация саласындағы әйелдердің көшбасшылығы» тақырыбында дөңгелек үстел өтті.
Іс-шараны Жамбыл облысы денсаулық сақтау басқармасы ҚР Денсаулық сақтау министрлігінің, Дүниежүзілік денсаулық сақтау ұйымының (ДДСҰ) Қазақстандағы өкілдігінің қолдауымен және 2023–2025 жылдарға арналған онкологиялық ауруларға қарсы күрестің кешенді жоспары аясында ұйымдастырды.
Кездесудің басты мақсаты – мемлекеттік органдардың, медицина қызметкерлерінің және қоғамдық ұйымдардың күш-жігерін біріктіре отырып, жатыр мойны обырының алдын алу мен адам папилломавирусына қарсы вакцинацияны дамыту.
Іс-шара барысында халықты ақпараттандыру, жалған түсініктерді сейілту және әйел көшбасшыларының иммундау саласындағы рөлін арттыру мәселелеріне ерекше назар аударылды.
Жамбыл облысы денсаулық сақтау басқармасының басшысы Сержан Назарбек атап өткендей, вакцинация – жатыр мойны обырынан қорғанудың ең сенімді тәсілі.
2024 жылдың қыркүйегінен бастап Қазақстанда 11–13 жас аралығындағы қыздарға вакцина салына бастады, бүгінде 278 мыңнан астам екпе жасалған.
2024 жылы Ұлттық егу күнтізбесіне енгізілген АПВ-ға қарсы вакцинацияның енгізілуі болашақта аурудың даму қаупін айтарлықтай төмендетеді деп күтілуде.
Дөңгелек үстел жұмысына ДДСҰ сарапшылары, санитарлық-эпидемиологиялық бақылау департаментінің, білім басқармасының, діни бірлестіктердің, медициналық мекемелер мен БАҚ өкілдері қатысты.
ДДСҰ иммундау бағдарламасының ұлттық үйлестірушісі Қанат Суханбердиев халықтың хабардарлығын арттырудың маңыздылығын атап өтті.
Ал ҚР ДСМ «Ұлттық қоғамдық денсаулық сақтау орталығының» Санитариялық-эпидемиологиялық сараптама және мониторинг ғылыми-практикалық орталығы филиалының директоры Айнагүл Қуатбаева АПВ-ға қарсы вакцинацияның жатыр мойны обырын болдырмаудың тиімді әрі қауіпсіз әдісі екенін айтты. Ол халық арасында сенімді арттыру және иммундау процесіне жүйелі бақылау орнату аурушаңдықты төмендетуге мүмкіндік беретінін жеткізді.
Жамбыл облыстық көпбейінді онкология және хирургия орталығының директоры Жандос Сейдахметов өңірдегі жатыр мойны обырына шалдығу жағдайына тоқталып, скрининг пен вакцинацияның тиімділігін баяндады.
Санитариялық-эпидемиологиялық бақылау департаменті басшысының орынбасары Нейли Муликова өңірдегі вакцинацияның қамтылуы жөнінде деректер ұсынды.
Білім басқармасы басшысының орынбасары Ләззат Қызылқұлова вакцина салу шешімінде отбасылар мен ұстаздардың, әсіресе аналардың рөлі ерекше екенін атап өтті.
Іс-шарада жеке өмірлік оқиғалар да айтылды: вакцина алған қыздар өз әсерлерімен бөлісті, ал жатыр мойны обырын жеңіп шыққан Гүлзира Сейтқадырова әйелдерді уақтылы тексеріліп, вакцина салдыруға шақырды.
Эпидемиолог дәрігер Сымбат Құлбаева АПВ вакцинациясының пилоттық жобасына қатысқан тәжірибесімен бөлісіп, екпенің қауіпсіздігіне сенімді екенін айтты.
Діни конфессиялар өкілдері де ислам мен христиан діндерінде вакцинацияға тыйым жоқ екенін растады.
Іс-шараның басты түйіні – жатыр мойны обырының алдын алуға болады, ал АПВ-ға қарсы вакцинация – әйелдер мен болашақ ұрпақ денсаулығын қорғаудың ең сенімді жолы.
Кездесу соңында қатысушылар «Мен Қазақстанда АПВ-ға қарсы вакцинацияны қолдаймын және жатыр мойны обырын жою қозғалысына қосыламын» атты декларацияға қол қойып, естелік суретке түсті.
