Қазақстанда ұялы байланыс операторлары қолданыстағы тыйымға қарамастан, онлайн-казино жарнамасын SMS хабарламалар арқылы таратып келеді. Бұл туралы Қаржы мониторингі агенттігі хабарлады.
Алматы, NEGE. Ведомствоның дерегінше, елде жаппай SMS тарату қызметін ұсынатын 11 агрегатор тіркелген, оның екеуі онлайн-казино жарнамасын жолдаумен айналысқан. Мысалы, бір қызметте Nomad-Casin және Sultan Game атты жіберуші аттары тіркеліп, агрегатор тарапынан мақұлданған. Осылайша, бұл атауларды жаппай SMS тарату кезінде еркін қолдануға мүмкіндік берілген.
«Сонымен бірге, «Жарнама туралы» заңның 6-бабына сәйкес, азаматтарға онлайн-казино жарнамасын жаппай таратуға тыйым салынған. Алайда ұялы байланыс операторлары тиісті сүзгіден өткізбестен осындай хабарламаларды халыққа таратып отыр. Бұл жағдай SMS-агрегаторлар мен байланыс операторлары қызметіне қатысты мемлекеттік реттеу мен бақылаудың болмауынан туындаған. Бұған қоса, қолданыстағы Әкімшілік құқықбұзушылық туралы кодексте мұндай әрекеттер үшін жауапкершілік қарастырылмаған», — делінген агенттік хабарламасында.
Осыған байланысты Жасанды интеллект және цифрлық даму министрлігі «Байланыс туралы» заң мен Әкімшілік кодекске түзетулер енгізуді ұсынып отыр. Ұсыныстарға сәйкес, агрегаторлар альфа-аттарды сатып алушыларды міндетті түрде сәйкестендіруі тиіс, сондай-ақ мұндай бұзушылықтарға жол берген тұлғалар үшін жауапкершілік белгілеу қарастырылған.
https://nege.kz/news/kazakstanda-baylanis-operatorlari-onlayn-kazino-zharnamasin-sms-arkili-taratkan-8349d6
