Бүгін Жуалы ауданында Республикалық мобильді қоғамдық қабылдау өтті.
Мемлекеттік органдар мен тұрғындар арасындағы тиімді диалог орнатуды мақсат еткен бұл іс-шара Жуалы ауданының Б.Момышұлы және Бәйтерек ауылдарында өтті. Шалғай елді мекен тұрғындарына өз өтініш-тілегін тікелей жауапты органдардың өкілдеріне жеткізуге мүмкіндік берілген қоғамдық қабылдауға «AMANAT» партиясы Республикалық қоғамдық қабылдау бөлмесінің консультанттары Асқар Құмарбай мен Сағындық Жылқыбаев, партияның Жамбыл облыстық филиалының төрағасы Дауыл Бейсенқұлов, облыстық басқарма басшылары, Жуалы ауданы әкімінің міндетін атқарушы Айдос Асабаев және аудандық бөлім басшылары қатысты.
Бүгінде 15 мыңнан астам тұрғыны бар ауылда тіршілік қалыпты, өндіріс саласы да қарқын алып келеді. Дегенмен, шешімін күткен кейбір әлеуметтік-экономикалық мәселелер де бар. Қабылдауға келген тұрғындар мал шаруашылығын дамыту үшін жеңілдетілген несие беру мәселесін көтерді. Сонымен қатар, «Ауыл аманаты» жобасы аясында несие рәсімдеу кезінде қажетті ауыл шаруашылығы техникалары мен құрылғылардың бағасын «Тараз» әлеуметтік-кәсіпкерлік корпорациясымен алдын ала келісу мүмкіндігін қарастыру туралы ұсыныс білдірді.
Бұдан өзге, азаматтар тұрғын үй, әлеуметтік көмек, жұмыспен қамту, жер және инфрақұрылымға қатысты мәселелерін көтеріп, тиісті сала мамандарынан нақты жауаптар мен қолдау тапты. Барлық ұсыныс-пікірлер мен өтініштер бақылауға алынып, кейбір мәселелер сол жерде шешімін тапты.
Келесі қоғамдық қабылдау аудан орталығынан 30 шақырым қашықтықта орналасқан Бәйтерек ауылында өтті. Халқы екі мыңға жуықтайтын бұл елді мекеннің негізгі тіршілік көзі — ауыл шаруашылығы. Ауыл Қырғыз Республикасымен шекараға жақын орналасқандықтан, тұрғындардың өмірі мен шаруашылығы көрші елмен тығыз байланысты. Осыған орай, Қырғыз жағынан келетін ағын судың көлемін арттыру мәселесі жиын барысында басты назарға алынды. Сонымен қатар, ауыл ішіндегі инфрақұрылымның әлсіздігі де тұрғындар көтерген өзекті мәселелердің бірі болды.
Тұрғындардың өтінішін ескерген Жуалы ауданы әкімінің міндетін атқарушы Айдос Асабаев алдағы уақытта тиісті шешімдер қабылданатынын айтты. Қоғамдық қабылдау барысында тұрғындар ауыл шаруашылығы, білім және денсаулық сақтау салалары бойынша жеке сұрақтарын қойып, жауапты мамандардан толық әрі түсінікті жауаптар алды.
