Қоғамның дамуы мен мемлекет іргесінің беки түсуінде әйелдердің рөлі айрықша екені белгілі.
«AMANAT» партиясы жанындағы Әйелдер қанаты ел өміріндегі маңызды әлеуметтік, экономикалық және мәдени бастамаларды жүзеге асыруда ерекше белсенділік танытып келеді.
Бұл жиын облыстың дамуына өз үлесін қосып жүрген әйелдердің басын біріктірген, пікір мен тәжірибе тоғысқан маңызды алаңға айналды.
Кездесуге ҚР Парламенті Мәжілісінің депутаты, партиямыздың Әйелдер қанатының тең төрағасы Гүлдара Нұрым, облыс әкімдігіне қарасты басқарма басшылары, ҮЕҰ өкілдері мен әйелдер істері және отбасылық-демографиялық саясат жөніндегі комиссия мүшелері қатысты.
Облыс әкімдігі аппараты басшысының орынбасары Серік Құрманбеков отбасылық және гендерлік саясаттың өңірдегі жүзеге асырылу барысы туралы айтты. Өз сөзінде ол ауыл әкімдігіне әйелдердің көптеп қатысуына жағдай жасау қажеттігін және бұл бағытта партиялық қолдаудың маңыздылығын атап өтті.
Кездесу барысында Тараз қалалық Әйелдер қанатының үйлестірушісі Жанат Ертаева, облыстық мәслихат депутаты Анар Сағынтайқызы Бексұлтанова, сондай-ақ облыстық тұрмыстық зорлық-зомбылық құрбандарына әлеуметтік көмек көрсету орталығының директоры Анар Биғабылова әйелдердің өңірлік басқару ісіне, экономика, әлеуметтік сала мен құқықтық процестерге белсенді араласуы туралы өз ұсыныстарын жеткізді.Кездесу барысында қоғамдағы әйелдердің рөлі, олардың көшбасшылық қасиетін дамыту, ауыл әйелдерінің әлеуетін арттыру және отбасылық құндылықтарды сақтау тақырыптары жан-жақты талқыланды.
Әңгіме өзегі елдік сана, бірлік пен жауапкершілік, азаматтық белсенділікті арттыру тақырыптарына арналды.
