«Жол – экономика күретамары» деп бекер айтылмаған. Өңірдің экономикалық әлеуеті жолдардың жағдайымен де өлшенетіні белгілі. Өңірлік коммуникациялар қызметінің алаңында өтіп жатқан баспасөз конференциясының барысында Тараз қаласының әкімі Бақытжан Орынбеков шаһардың жолдарын асфальттау жұмыстары жайында баяндады.
– 2023 жылы ұзындығы 87,5 шақырымды құрайтын 147 көше орташа жөнделді. 2024 жылы ұзындығы 86,7 шақырымды құрайтын 120 көше орташа жөндеуден өтті. Ал ағымдағы жылы 61,4 шақырымды құрайтын 108 көше орташа жөндеуден өтті. Одан бөлек, 2024-2025 жылдары «Құмшағал», «Шөлдала» тұрғын алқаптарындағы және 28 саяжайдағы 320 көшеге қиыршық тас жол салынды.
Сонымен қатар ұзындығы 35,3 шақырым болатын 18 жаяу жүргінші жолдары салынды. Рысбек батыр көшесін қайта жаңғырту жұмыстары аяқталса, Қолбасшы Қойгелді және А.Асқаров көшелерінде қайта жаңғырту жұмыстары жүргізілуде.
Көптен бері өзекті мәселе болып келген «Бурыл А,Б,В» алқабындағы 75 көшеге және «Барысхан» тұрғын алқабында 24 көшеге асфальт жабындысын төселіп, жұмыстар толығымен аяқталды. Жалпы соңғы 3 жылда бұрылыс, тұйықтарды есептегенде қалада 474 көшеге асфальт төселіп, ауқымды жұмыстар атқарылды, – деді Бақытжан Әмірбекұлы.
Ал келер жылы 28 саяжай арқылы өтетін орталық көшені, қалаға батыстан кіре беріс көшені және Жауғаш батыр көшесін қайта жаңғыртудан өткізу жоспарлануда.
Атқарылған жұмыстардың нәтижесінде соңғы 3 жылда қанағаттанарлық жағдайдағы жолдардың үлесі 58,6 пайыздан 74,5 пайызға дейін артады деп күтілуде. Сәйкесінше, асфальт жабындысы төселмеген көшелердің саны 41,4 пайыздан 25,5 пайызға дейін төмендеген.
