Өткен аптада Сарыкемер ауылында көптен күткен дене шынықтыру — сауықтыру кешені ашылды. Аумағы 1000 шаршы метрден асатын ғимаратта футбол, волейбол, баскетбол, стол теннисі үйірмелері мен жаттығу залы жұмыс істейтін болады. Кешеннің ашылу салтанатына ауыл тұрғындары көп жиналды. Онда алдымен аудан әкімі Олжас Баққараев сөз алып, ауыл тұрғындарын қуаныштарымен құттықтады.
— Мемлекет басшысы үнемі салауатты өмір салтын насихаттап, бұқаралық спортты дамытуға айрықша мән беріп келеді. Әсіресе жасөспірімдердің спортпен жан-жақты айналысуларына тұрақты жағдай жасау қажеттігіне ерекше көңіл бөлуде. Президент тапсырмасына орай ауданымызда 208 спорт нысаны қызмет етсе, 45 шағын футбол алаңдары бюджет және демеушілер тарапынан соғылып, пайдалануға берілген. Міне осындай спорт нысандарында шыңдалған спортшыларымыз облыс қана емес республика көлемінде де жоғары жетістіктерге жетіп келеді. Бүгінгі ашылғалы отырған спорт кешені де жас спортшылардың шеберліктерін шыңдайтын орынға айналсын,- деді аудан басшысы.
Бұдан кейін сөз алған КСРО чемпионаттарының бірнеше дүркін жүлдегері, самбодан халықаралық дәрежедегі спорт шебері, Байзақ ауданының Құрметті азаматы, жерлесіміз Алмас Мұсабеков ауданымыздан шыққан Ж.Үшкемпіров, Б.Жұмаділов, Б.Ниязымбетов, А.Шымберген, тағы басқа да бірнеше талантты спортшылардың ауданымыздың абыройын асқақтатқанын атап өтті. Енді міне сол саңлақ спортшылардың ізін басқан жастарға мұндай спорт кешенінің тигізер пайдасының мол екендігін айтты. Жасының ұлғайғанына қарамастан өзі әліде спортпен айналысып жүргені, ардагерлер арасында әлемнің 10 дүркін чемпионы болғандығына тоқталды.
Бас мердігер ТОО “Bek stroy-2010” жауапкершілігі шектеулі серіктестігі соққан спорт кешенінің ашылу лентасын аудандық ардагерлер кеңесінің төрағасы Бердібек Омаров пен ардагер спортшы Асқар Бекбауов қиған бетте ақжаулықты аналар жағалай шашу шашты.
Аудан әкімі бастаған ауыл тұрғындары екі қабатты спорт кешенін түгел аралап, көрді.
Спорт кешенінің үлкен залында аудан басшысы Олжас Елебекұлы биылғы жылы Алматы облысында өткен ауыл спортының ең ірі додаларының бірі VIII республикалық “Ақ бидай — 2025” ойындарында кіші футболдан 3 дүркін чемпион атанған аудан командасы мүшелерімен кездесті.
Олардың алдағы уақытта да спортта биік шыңдарды бағындыра берулеріне тілек білдіріп, бірыңғай спорттық киімдер мен бірнеше футбол добын сыйға тартты. Спорт мамандарына кешенді күтіп ұстап, осындағы әртүрлі спорттық үйірмелерден ауылдың талантты жастары шыңдалып, келешекте спорт жұлдыздары атануына тілек білдірді.
«Amanat» партиясының Сайлауалды бағдарламасы аясында соғылған спорт кешені ауданымыздағы бұқаралық спортпен айналысушылардың қатарын көбейте түсетін болады. Халық денсаулығын жақсатуға, жастардың бос уақытын тиімді өткізуге мол мүмкіндік береді.
Іс-шара соңы самбодан халықаралық дәрежедегі спорт шебері А.Мұсабеков пен “Ақ бидай — 2025” футбол командасы мүшелерін ортаға алып суретке түсумен түйінделді.
Сундетулла Абилов,
Сарыкемер ауылы.
