Қарағанды облысында 1953 жылы туған, 18 желтоқсанда жоғалып кеткен ер адамды іздеу жұмыстары аяқталды, деп хабарлайды turkystan.kz.
Алдын ала мәліметтерге сәйкес, ер адам жеңіл автокөлікпен мал іздеуге шығып, қайта оралмаған. Оның жоғалғаны туралы хабар 21 желтоқсанда түскен.
Іздеу-құтқару жұмыстарына Қарағанды облысының Төтенше жағдайлар департаментінің күштері, полиция қызметкерлері, Қазақстан Республикасы ТЖМ-нің №52859 әскери бөлімі, «Қазавиақұтқару» авиациясы, сондай-ақ еріктілер мен жоғалған азаматтың туыстары тартылды.
Іздеу тәулік бойы жүргізілді. Құтқарушылар аумақты және ықтимал жүру бағыттарын тексеріп, екі ұшқышсыз ұшу аппаратын және Starlink спутниктік байланыс жабдықтарын пайдаланды.
23 желтоқсанда, Шет ауданында, Ағадыр кентінен батысқа қарай шамамен 25 шақырым жерде ер адамның мәйіті көліктің ішінен табылды.
«Көлік Ағадыр кентінен Ортау ауылы бағытында, шамамен 35 шақырым қашықтықта, төбешіктердің ар жағындағы дала жолында орналасқан. Автокөлік қарға көміліп қалған. Көлік салонында, жүргізуші орындығында ер адамның мәйіті табылды. Зорлық-зомбылық белгілері анықталған жоқ. Қазіргі уақытта болған оқиғаның барлық мән-жайын анықтауға бағытталған тергеу шараларының кешені жүргізіліп жатыр», – деп хабарлады полиция.
Толық нұсқасына гиперсілтеме беруді ұмытпаңыз: https://turkystan.kz/article/273326-qaragandy-oblysynda-mal-izdep-ketken-72-zastagy-qariianyn-maiiti-tabyldy
