Облыс әкімі Ербол Қарашөкеевтің бастамасымен іске асқан «Әулиеата — кітап оқитын өңір» жобасы ауданымызда сәтті аяқталды. Жыл бойы жүзеге асқан бұл бастама — өңір тұрғындарының кітапқа, білім мен өнерге деген сүйіспеншілігін арттырды.
Бүгін аудандық мәдениет үйінде аталмыш жобаның қорытынды шарасы өтті. Алдымен келушілер фойеде кітап көрмесімен танысып, рухани азық алды. Салтанатты шараның шымылдығы «Айлин» би тобының «Шашу» биімен ашылды. Аудан әкімі Сәкен Мамытов барша аудан тұрғындарын Жаңа жыл мерекесімен құттықтап, жобаның ауданымызда сәтті жүзеге асқанын атап өтті.
Жиында түрлі номинациялар бойынша оқырмандар мен кітапхана ұжымы, сондай-ақ үздік кітап оқитын мектептер марапатталды.
Рухани кеш концерттік бағдарламаға ұласып, аудандық мәдениет үйінің әншілері патриоттық рухта әндерді шырқаса, «Айжанқыз» халықтық бишілер ұжымы түрлі нақышта мың бұрала биледі.
Кітап – өткен мен болашақты жалғаған алтын көпір. Бүгінгі шара соның айғағы. Әулиеата өңірі кітаппен нұрланып, Оқырман ұлттың рухы биіктей берсін!
